काठमाडौं । जनमत पार्टीले संगठन विस्तार तथा आगामी महाधिवेशनलाई लक्षित गर्दै क्रियाशील सदस्यता अद्यावधिक र नवीकरण प्रक्रिया अघि बढाएको छ। पार्टीले आफ्ना सदस्यलाई सम्बन्धित जिल्ला कार्यालयमार्फत क्रियाशील सदस्यता फारम बुझाउन आग्रह गरेको छ।

पार्टीका अनुसार क्रियाशील सदस्यता अद्यावधिक वा नवीकरण भएका सदस्यले मात्र महाधिवेशन प्रतिनिधि बन्न पाउनेछन्। त्यस्तै, महाधिवेशन तथा पार्टीभित्र हुने अन्य निर्वाचनमा उम्मेदवार बन्नसमेत क्रियाशील सदस्यता अनिवार्य गरिएको छ।

जनमत पार्टीले सदस्यता नवीकरणका लागि तोकिएको शुल्क बुझाउनुपर्ने जनाएको छ। पार्टी विधानअनुसार साधारण सदस्यता शुल्क वार्षिक १० रुपैयाँ र क्रियाशील सदस्यता शुल्क वार्षिक १०० रुपैयाँ तोकिएको छ। नवीकरण गर्नुपर्ने प्रत्येक वर्षका लागि १०० रुपैयाँका दरले शुल्क बुझाउनुपर्ने व्यवस्था गरिएको छ। क्रियाशील सदस्यले नियमित आर्थिक सहयोग अर्थात् लेवीसमेत बुझाउनुपर्नेछ।

पार्टी विधानको धारा ९ अनुसार साधारण सदस्य बनेको कम्तीमा एक वर्ष पूरा गरी पार्टीप्रति निष्ठावान् रूपमा सक्रिय रहेका सदस्यले क्रियाशील सदस्यताका लागि आवेदन दिन सक्नेछन्। यसका लागि तोकिएको शुल्क तथा लेवी बुझाएर पार्टीका मातहत समितिको सिफारिस लिनुपर्नेछ।

वडा तहदेखि माथिल्लो तहका पार्टी समितिले आवश्यक प्रक्रिया पूरा भएपछि क्रियाशील सदस्यता प्रदान गर्ने व्यवस्था रहेको जनाइएको छ। क्रियाशील सदस्यले आफ्नो क्षेत्रको पार्टी बैठक, अधिवेशन तथा महाधिवेशनमा मतदान गर्न र विभिन्न पदमा उम्मेदवारी दिन पाउनेछन्।

सदस्यता अद्यावधिक प्रक्रियालाई व्यवस्थित बनाउन पार्टीले सबै जिल्ला कार्यालयलाई छुट्टै डेस्क वा जिम्मेवार पदाधिकारी तोकेर फारम संकलन गर्न निर्देशन दिएको छ।

Originally published on abcnews.com.np.