काठमाडौँ, ७ चैत । नेपाली क्रिकेट टोलीका पूर्वकप्तान पारस खड्का सम्मिलित एसिया लायन्सले लिजेन्ड्स क्रिकेट लिग मास्टर्सको उपाधि जितेको छ । सोमबार राति भएको उपाधि भिडन्तमा लायन्सले वर्ल्ड जायन्ट्सलाई ७ विकेटले हराउँदै च्याम्पियन बनेको हो ।

कतारको दोहामा भएको फाइनलमा पहिले ब्याटिङ गरेको जायन्ट्सले ४ विकेटको क्षतिमा १४७ रन बनाएको थियो । उसका लागि दक्षिणा अफ्रिकी महान अलराउन्डर ज्याक कालिसले नटआउट ७८ रन जोडे । न्युजिल्यान्डका रोस टेलरले ३२ तथा लेन्डल सिमन्सले १७ रन बनाए ।

एसियाका अब्दुर रजाकले २ तथा थिसारा परेराले १ विकेट लिए ।

१४८ रनको लक्ष्य पाएको एसिया लायन्सले ३ विकेटको क्षतिमा १६.१ ओभरमा पूरा गर्‍यो । लायन्सको जितमा उपुल थारंगाले ५७ तथा तिलकरत्ने दिलशानले ५८ रनको योगदान दिए । पहिलो विकेटका लागि थारंगा र दिलशानले १० ओभरमा ११५ रनको शतकीय साझेदारी गरेका थिए । ब्रेट लीले थारंगालाई बोल्ड गर्दै साझेदारी तोडेका थिए ।

यस्तै, मिस्बाह उल हक र मोहम्मद हफिज ९–९ रनमा अविजित रहे । जायन्ट्सका ब्रेट ली, स्मित पटेल र मोन्टी पनेसारले एक–एक विकेट लिए ।

खेलमा नेपालका पूर्वकप्तान खड्काले बलिङ र ब्याटिङ गर्न भने मौका पाएनन् । खड्काले समूह चरणका दुई खेलमा भने ब्याटिङ गरेका थिए ।