इटहरी, १० चैत । राष्ट्रिय जागृति क्लबको आयोजनामा जारी १३औँ अन्तर्राष्ट्रिय आमन्त्रण कन्ट्रोल इटहरी गोल्डकपमा चर्च ब्वाइज युनाइटेड काठमाडौँले फाइनल खेलयात्रा तय गरेको छ ।

बिहीबार भएको अन्तिम सेमिफाइनल खेलमा साविक उपविजेता त्रिभुवन आर्मी क्लबको आत्मघाती गोलले चर्च ब्वाइज फाइनलमा प्रवेश गरेको हो । प्रतियोगितामा चर्च ब्वाइजले आर्मीलाई १–० गोल अन्तरले पराजित गर्दै फाइनलका लागि स्थान सुरक्षित गर्न सफल भएको हो ।

खेलको २२औँ मिनेटमा आर्मी क्लबका दीपक गुरूङले गोल रोक्न खोज्दा अचानक आत्मघाती गोल भएको थियो । चर्च ब्वाइजले पाएको फ्रिकिक गोल बचाउन खोज्दा हेडिङमार्फत् आत्मघाती गोल भएको हो । पहिलो हाफमा पाएको तीन अवसरलाई सदुपयोग गर्न नसकेको आर्मीले दोस्रो हाफमा पाएको एक मात्र अवसरलाई खेरा फालेपछि दाबेदार आर्मी सेमिफाइनलबाटै बाहिरिएको छ ।

त्यसपछि दुवै टिमबाट गोल हुन नसक्दा विपक्षी क्लबबाट पाएको आत्माघाती उपहार गोल नै चर्च ब्वाइजका लागि निर्णायक सावित बन्यो । खेलको म्यान अफ दि म्याच चर्च ब्वाइज काठमाडौँका फ्यांकलिंक ताल्ला घोषित भए । उनले नगद १० हजारसहित ट्रफी हात पारे ।

प्रतियोगिताको उपाधि विजेताले १० लाख र उपविजेताले पाँच लाख तथा ट्रफीसहित मेडल प्राप्त गर्ने आयोजकले बताएको छ ।