काठमाडौँ, १३ चैत । क्रिस्टियानो रोनाल्डोले दुई गोल गरेको खेलमा पोर्चुगलले लक्जमबर्गमाथि सानदार जित निकालेको छ ।

युरो २०२४ को छनोटअन्तर्गत समूह ‘जे’को खेलमा पोर्चुगलले लक्जमबर्गमाथि ६–० को फराकिलो जित निकालेको हो । पहिलो हाफमा ४ गोल गरेको पोर्चुगलले दोस्रो हाफमा थप २ गोल गर्‍यो । पोर्चुगलको जितमा जोआओ फेलिक्स, बर्नार्डो सिल्भा, ओटाभियो र राफेल लिओले थप १–१ गोल गरे ।

लक्जमबर्गमा आइतबार राति गोलको वर्षा भएको एकपक्षीय खलेको ९औँ मिनेटमा रोनाल्डको गोलबाट पोर्चुगलले अग्रता लिन सफल भयो । उनले नुनो मेन्डेसको हेडरलाई फाइनल टच दिएका थिए ।

१५औँ मिनेटमा फेलिक्सले गोल गर्दै अग्रता दोब्बर पारे । त्यसको ३ मिनेटपछि सिल्भाले गोल गर्दै अग्रता तेब्बर पारे । उनले जोओ पाल्हिन्हाको पासलाई सदुपयोग गरे ।

खेलको ३१औँ मिनेटमा अल नासारका फरवार्डसमेत रहेका रोनाल्डोले व्यक्तिगत दोस्रो गोल गर्दै पहिलो हाफमा टोलीलाई ४–० को अग्रता दिलाए । पछिल्लो दुई खेलमा रोनाल्डोको यो चौथो अन्तर्राष्ट्रिय गोल हो । उनले यसअघि लिचेस्टाइनविरूद्ध पनि दुई गोल गरेका थिए । यससँगै रोनाल्डोले १९८ खेलमा १२२ अन्तर्राष्ट्रिय गोल गर्न सफल भएका छन् ।

७७औँ मिनेटमा परिवर्तित खेलाडी ओटाभियोले गोल गरेपछि पोर्चुगल ५–० ले अघि बढ्यो । ७५औँ मिनेटमा फेलिक्सले स्थानमा मैदान छिरेका उनले दोस्रो मिनेटमा नै अर्का परिवर्तित खेलाडी राफयल लियोको पासमा गोल गर्न सफल भए ।

योसँगै पोर्चुगल युरो २०२४ छनोटका सुरूवाती दुई खेल जितेर समूह ‘जे’को शीर्ष स्थानमा छ । पोर्चुगलले २ खेलबाट ६ अंक जोडेको छ । स्लोभाकिया ५ अंकसहित दोस्रो स्थानमा रहँदा बोस्निया र आइल्यान्डको समान ३ अंकका साथ तेस्रो र चौथो स्थानमा छ । यस्तै, लक्जमबर्ग १ अंक जोड्दै पाँचौँ तथा अंकविहीन लिचेस्टाइन पुछारमा छ ।