सुर्खेत, १९ चैत । उपल्लो डोल्पामा उद्धारका लागि जाने हेलिकोप्टरमा कर्मचारीले जान खोज्दा आफूहरु समस्यामा परेको पीडितले बताएका छन् ।

बिरामी उद्धारदेखि अन्य प्रयोजनका लागि उपल्लो डोल्पामा जाने हेलिकोप्टरमा जिल्लास्थित कर्मचारीले निःशुल्क जान खोज्दा आफूहरु पीडित भएको बताएका हुन् । जिल्ला प्रशासन कार्यालयदेखि जिल्ला प्रहरी हुँदै पहुँचवाला कार्यालयका कर्मचारीहरु हेलिकोप्टरमा हालिमुहाली हुँदै आएपछि पीडित अन्यायमा परेका छन् भने राज्यमाथि आर्थिक भार थपिन पुगेको छ ।

पर्यटकलाई उद्धारदेखि सुत्केरी उद्धारसम्मका कामहरुमा हेलिकोप्टर लिँदा कर्मचारीहरु घुम्न सोही हेलिकोप्टरमा जाँदा बढी महँगो हुने गरेको पीडितको भनाइ छ । जनताले लगानीमा उडाएको हेलिकोप्टरमा कर्मचारीको रजाइँ हुँदा हेलिकोप्टरको उडान समय बढी हुने गरेको छ ।

जति समय बढी खर्च भयो, उत्तिनै खर्च बढी आउने भएपछि आफूहरु मर्कामा परेको उपल्लो डोल्पास्थित डोल्पोबुद्ध गाउँपालिका–३ का खाम्पा छुल्डीम गुरुङले बताए । उपल्लो डोल्पाको डोल्पोबुद्ध, शे फोक्सुण्डोमा हलिकोप्टर उडाउन शे फोक्सुण्डो राष्ट्रिय निकुञ्जले दिने गर्दछ । छार्काताङसोङ, ठुलिभेरी, त्रिपुरासुन्दरीलगायतका क्षेत्रमा हेलिकोप्टर उडाउन जिल्ला प्रशासन कार्यालयले दिने गर्दछ ।

निकुञ्ज क्षेत्रभित्र हेलिकोप्टर उडाउदा निकुञ्ज भित्रको सेनालाई लिएर उडान भर्नुपर्ने भए पनि त्यसमा समेत अन्य कर्मचारी कै हालिमुहाली हुने गरेको छ । बिपद तथा समस्यामा परेका सर्वसाधारणले लिने हेलिकोप्टरमा कर्मचारीले घुम्न खोज्दा खर्चसमेत बढी आउँदा स्थानीयबासीहरु आर्थिक मारमा परेका छन् ।

डोल्पाका प्रमुख जिल्ला अधिकारी भूमिश्वर पोखरेलले आफूसम्म केही गुनासो आएको बताए । अब आउने हेलिकोप्टरमा आफूले समन्वय गरेर कसैलाई पनि मर्का नपर्ने गरी काम गर्ने बताए ।

यता निकुञ्जका प्रमुख लालबहादुर भण्डारीले निकुञ्जले कुनै असहयोग नगरेको बताए । निकुञ्ज क्षेत्रभित्र हेलिकोप्टर लिँदा सुरक्षाकर्मी लिनुपर्ने भएपनि अहिलेसम्म त्यो काम भने हुन नसकेको उनको भनाइ छ ।