काठमाडौं १ साउन ।
नेपाल राष्ट्र बैंकले मुलुकमा व्यापार घाटा बढ्दै गएकाले अनुत्पादक क्षेत्रमा लगानी कम गर्न बैंक तथा वित्तीय संस्थाहरुलाई निर्देशन दिनु परेको स्पष्ट पारेको छ । गभर्नर चिन्तामणि शिवाकोटीले व्यापार घाटा कम गर्ने उद्देश्यका साथ सुनको आयातमा सीमा तोक्नु परेको स्पष्ट पार्नुभयो ।

आइतबार काठमाडौंमा भएको ‘आर्थिक वर्ष २०७४÷७५ को मौद्रिक नीति’ विषयक अन्तरक्रियामा उहाले निर्यात व्यापार बढाउन राष्ट्र बैंकले उत्पादनमूलक क्षेत्रमा लगानी बढाउन प्रोत्साहनको नीति लिएको स्मरण गराउनुभयो । नेपालमा हाल ७ सय ४७ अर्ब वार्षिक व्यापार घाटा छ ।

वर्सेनि ७ सय ८० अर्ब रुपैया भन्दा बढीको आयात हुने गरेको तर निर्यात व्यापार ७५ अर्ब रुपैयाको मात्रै हुने गरेको पनि डेपुटी गभर्नर शिवाकोटीले उल्लेख गर्नुभयो ।

नेपाल राष्ट्र बैंकले सम्पत्ति शुद्धिकरण अभियानलाई कडाइका साथ लागू गर्ने नीति लिने तयारी पनि गरेको छ । डेपुटी गभर्नर शिवाकोटीले मुलुक कालोसूचिमा पर्न नदिन बैंकले आवश्यक नीति लिने स्पष्ट पार्नुभयो ।