काठमाडौँ, १७ वैशाख । करिम बेन्जेमाले पहिलो हाफमै ह्याट्रिक गरेपछि स्पेनिस ला लिगामा रियल मड्रिडले अल्मेरियाविरूद्ध ४–२ को सहज जित निकालेको छ ।

बेन्जेमाले मड्रिडबाट खेलेको सबैखाले प्रतियोगिताको पछिल्लो ८ खेलमध्ये तीन खेलमा ह्याट्रिक गरेका छन् । जिरोना र रायो भालेकानोसँग दुई अप्रत्यासित हार ब्यहोरेपछि मड्रिडले घरेलु मैदानमा अल्मेरियाविरूद्ध ह्याट्रिक गर्दा जित निकालेको हो ।

मड्रिडको जितमा ह्याट्रिक गरेका बेन्जेमा ला लिगामा सर्वाधिक गोल गर्ने चौथो खेलाडी बनेका छन् । ला लिगामा लियोनल मेस्सी ४७४ गोल गर्दै सर्वाधिक गोलकर्ताको शीर्ष स्थानमा छन् । ३११ गोल गरेका क्रिस्टियानो रोनाल्डो दोस्रो र २५२ गोल गरेका जारा तेस्रो स्थानमा छन् । बेन्जेमाले ४३६ खेलमा २३६ गोल गरेका छन् ।

पाँचौँ मिनेटमा बेन्जेमाले गोल गर्दै घरेलु टोलीलाई अग्रता दिलाएका थिए । १७औँ मिनेटमा बेन्जेमाले नै मड्रिडको अग्रता दोब्बर पारे । ४२औँ मिनेटमा प्राप्त पेनाल्टीमा कुनै गल्ती नगरी गोल गरेपछि बेन्जेमाले पहिलो हाफमै ह्याट्रिक गरेका थिए ।

पहिलो हाफको इन्जुरी समयमा अल्मेरियाका भिनिसियस मार्किसले गोल गर्दै मड्रिडको अग्रतालाई ३–१ मा झारेका थिए ।

४७औँ मिनेटमा रोड्रिगोले गोल गर्दै मड्रिडलाई ४–१ को स्थितिमा पुर्‍याए । तर, ६१औँ मिनेटमा अल्मेरियाका लुकास रोबर्टोले गोल गर्दै मड्रिडको अग्रतालाई ४–२ को अवस्थामा ल्याएका थिए । त्यसपछि थप गोल हुन नसक्दा मड्रिड विजयी हुन सफल भयो ।

जितसँगै ३२ खेलबाट ६८ अंक जोडेको मड्रिड तालिकाको दोस्रो स्थानमा छ । जुन शीर्ष स्थानको बार्सिलोनाभन्दा ११ अंक कम हो । समान खेलबाट ७९ अंकसहित बार्सिलोना तालिकाको शीर्ष स्थानमा छ । लिगमा अब ६ खेल मात्र बाँकी छन् ।

यता, ३२ खेलबाट ३३ अंक जोडेको अल्मेरिया तालिकाको १५औँ स्थानमा छ ।