सप्तरी, १७ माघ । महेन्द्र विन्देश्वरी बहुमुखी क्याम्पस राजविराजलाई नव स्थापित राजर्षि जनक विश्वविद्यालयमा गाभ्ने सरकारी निर्णयको विरोध भएको छ । उक्त निर्णको सोही क्याम्पसका प्राध्यापक तथा कर्मचारीहरूले बिरोध जनाएका हुन् ।

नेपाल प्राध्यापक संघ मविव क्याम्पस इकाई राजविराजको नेतृत्वमा क्याम्पसका प्राध्यापक, शिक्षक तथा कर्मचारीहरुको बृहत बैठकमा वक्ताहरुले उक्त निर्णय नसच्याइए प्राध्यापक तथा कर्मचारीहरूले आन्दोलन थाल्ने चेतावनी दिएका छन् ।

बैठकमाा सहायक क्याम्पस प्रमुख मिथिलेश यादवले राजर्षि जनक विश्वविद्यालय प्रदेश नं. २ मा स्थापना भएकोप्रति स्वागतयोग्य भएको भन्दै सो विश्वविद्यालयमा नयाँ क्याम्पसहरुलाई आवद्धता गराउनु पर्नेमा जोड दिएका छन् । उनले मविव क्याम्पस राजविराज स्थापनाकालदेखी नै त्रिविमा रहेकोले यसलाई त्रिविमै यथावत राख्न माँग समेत गरे ।

यस्तै नेपाल आंशिक प्राध्यापक संघका सभापति रन्धिर कुमार कर्णले राजर्षि जनकले विश्वविद्यालयमा मविव क्याम्पस राजविराज गाभिएमा क्याम्पसका अस्थायी, करार, आंशिक शिक्षक र कर्मचारीहरु स्वतः खारेज हुने उल्लेख भएकोले यस्ता कदमको बिरोध गरेका छन् । उनले त्रिविमै क्याम्पसलाई यथावत राख्न सरकारसँग माँग गरेका छन् ।

सोही बैठकमा त्रिवि कर्मचारी संघका केन्द्रिय प्रतिनिधि चन्देश्वर यादवले क्याम्पसलाई गाभ्ने निर्णय दुर्भाग्यपूर्ण रहेको भन्दै निर्णय यथासिघ्र नसच्याइए आन्दोलनमा जानुको विकल्प नरहेको बताए ।

बैठकमा नेपाल प्राध्यापक संघ, प्रजातान्त्रिक प्राध्यापक संघ, प्रगतिशिल प्राध्यापक संगठन, नेपाल राष्ट्रिय प्राध्यापक संगठन, मधेशवादी प्राध्यापक संघ, आंशिक शिक्षक संघ र त्रिवि कर्मचारी संघले उक्त निर्णयको बिरोधमा ऐक्यबद्धता जनाएका छन् ।

यसैबीच सो बैकठले नेपाल प्राध्यापक संघ राजविराजका अध्यक्ष सिंघेश्वर प्रसाद यादवको संयोजकत्वमा गठित सो समितिमा गजेन्द्र कुमार सिंह यादव, पंचदेव यादव, गोवद्र्धन साह, उमेश कुमार यादवलगायत रहेको संघका सचिव राजिव कुमार मिश्रले जनाएका छन् ।

यस्तै समितिले उक्त निर्णयको विरोधमा शुक्रवार स्थानीय प्रशासन मार्फत सरकारलाई ज्ञापन पत्र बुझाउने तयारी गरेको छ ।