काठमाडौँ, १९ वैशाख । एसीसी प्रिमियर कपको जारी फाइनल खेलमा युएईले घरेलु टोली नेपाललाई १ सय १८ रनको सामान्य लक्ष्य दिएको छ ।

कीर्तिपुरस्थित त्रिवि क्रिकेट मैदानमा नेपालले टस जितेर फिल्डिङ रोजेपछि ब्याटिङ गरेको युएई ३३.१ ओभरमा ११७ रनमा अलआउट भयो ।

ललित राजवंशीले ३४औँ ओभरको पहिलो बलमा जुनैद सिद्दीकीलाई कुशल भुर्तेलको हातबाट क्याच आउट गराउँदै युएईलाई अलआउट गरे । सिद्दीकी १० रनमा क्याच आउट भए । कार्तिक मैयाप्पन १ रनमा नटआउट रहे ।

२७.३ ओभरमा यूएई ९ विकेट गुमाएर १०६ रन बनाउँदा पानी परेपछि खेल रोकिएको थियो । त्यसपछि लगातार वर्षाका कारण खेल हुन नसकेपछि आजका लागि सारिएको हो ।

काठमाडौँमा आज पनि वर्षाको सम्भावना देखाएको छ । आजको खेलमा पनि वर्षा बाधक बने सुपर ओभरबाट निर्णय लिइने प्रयास गरिनेछ। सुपर ओभर पनि हुन नसके आइसीसी ओडिआइ वरियताको आधारमा नेपाल एसिया कप पुग्ने छ।

युएईलाई कम स्कोरमा रोक्न ललित राजवंशी एक्लैले ४ विकेट लिए । ललितले ७.१ ओभरमा २ मेडन राख्दै मात्र १४ रन खर्चे । करण केसी र सन्दीप लामिछानेले समान दुई विकेट लिए । सन्दीपले आफ्नो स्पेलमा २ मेडन राख्दै ३४ रन दिए । करणले ७ ओभरमा १ मेडन राख्दै २६ रन खर्चे । सोमपाल कामी र गुलसान झाले एक एक विकेट आफ्नो नाममा गरे ।

यूएईका लागि आशिफ खानले सर्वाधिक ४६ रन बनाए । आर्यन लाक्राले १३ र कप्तान तथा ओपनर मुहम्मद वसिमले ११ थपे । बसिल अहमदर र जुनैद सिद्दीकीले समान १० रन बनाए । अन्य ब्याटरले दोहोरो अंकको स्कोर छुन सकेनन् ।