पोखरा, २१ वैशाख । नेपाल खेलकुद पत्रकार मञ्च गण्डकीले आयोजना गर्दै आएको पोखरा स्पोर्टस् अवार्डको सातौँ संस्करण यही वैशाख २३ गते पोखरा सभागृहमा हुँदै छ ।

गण्डकी प्रदेशका खेलाडी र खेलकुदकर्मीका लागि स्पोर्टस् अवार्ड सर्वाधिक चासोका रुपमा रहने गरेको छ । खेलकुद क्षेत्रमा लागेका खेलाडी, प्रशिक्षक, खेलकुद संस्था र खेल पत्रकारले सयौँको उपस्थितिमा प्रतिष्ठित अवार्ड प्राप्त गर्ने भएकाले यसप्रति खेलकुदकर्मीको कौतुहलता र चासो बढी हुने गर्दछ ।

खेलाडीले राष्ट्रि«य तथा अन्तर्राष्ट्रिय प्रतियोगितामा अघिल्लो वर्ष प्राप्त गरेको सफलताका आधारमा मनोनयनमा परेका खेलाडीमध्ये सर्वोत्कृष्ट छनोट गरी अवार्ड प्रदान गर्दछन् । गण्डकी प्रदेशका खेलाडीले मात्र यसमा सहभागी बन्न पाउने प्रावधान छ । स्पोर्ट्स अवार्डअन्तर्गत वर्ष उत्कृष्ट खेलाडीमा समेत कडा प्रतिस्पर्धा हुने देखिएको छ । यो विधामा क्रिकेटका करण केसी (बागलुङ), आर्चरीका गंगाबहादुर कुँवर (तनहुँ) र टेनिसका प्रदीप खड्का (कास्की) मनोनयनमा परेका छन् ।

वर्ष उत्कृष्ट खेलाडीको अवार्डमा सर्वाधिक चासो रहने गर्दछ । मनोनयनमा परेका खेलाडीमध्येमा खेलमा प्राप्त गरेको उपलब्धिलाई आधार मानेर मञ्चद्वारा गठन गरिएको खेलाडी छनोट समितिका आधारमा सर्वोत्कृष्ट खेलाडी छनोट गरिने मञ्चका अध्यक्ष दीननाथ बरालले बताए ।

उनले भने, “उत्कृष्ट खेलाडी छनोटका मुख्य आधारनै खेलाडीको प्रदर्शन र उपलब्धि हो । यसैमा रहेर वर्ष उत्कृष्ट खेलाडीलाई अवार्ड प्रदान गर्नेछौँ ।” वर्ष उत्कृष्ट खेलाडीको उपाधि जित्ने खेलाडीले टेल्जी नेपालको टाइगर इलेक्ट्रिक स्कुटर र ट्रफी हात पार्नेछन् । नेपाली राष्ट्रिय क्रिकेट टोलीका महत्वपूर्ण सदस्य करण केसी क्रिकेटका अलराउण्डर खेलाडी हुन् । राट्रिय टोलीबाट एक दिवसीय क्रिकेटमा बलिङ तथा फिल्डिङमा ४० खेल खेलेका छन् । यस अवधिमा उनले तीन सय १४ रन बनाएका छन् ।

करणले नेपाललाई आइसिसी विश्वकप लिग–२ मा शीर्ष तीनमा रहँदै सोझै विश्वकप छनोटमा पुर्याउनुको साथै आगामी चार वर्षसम्मलाई ओडिआई मान्यता जोगाउन सानदार प्रदर्शन गरेका थिए । नेपालका तीव्र गतिका बलर करण केसी लिग–२ मा सर्वाधिक विकेट लिने खेलाडीको सूचीमा छैटौँ स्थानमा छन् ।

यसैगरी आर्चरीका गंगाबहादुर कुँवरले गण्डकी प्रदेशमा आयोजना भएको नवौँ राष्ट्रिय खेलकुद प्रतियोगितामा तीन स्वर्ण पदक जित्न सफल भए । उनले व्यक्तिगत रिकर्भ, रिकर्भ पुरुष टोली र रिकर्भ मिक्स टोलीमा स्वर्ण पदक जित्न सफल भएका हुन् । आर्चरी खेलमा गण्डकी प्रदेश टोली च्याम्पियन बनेको थियो ।

नेपालका टेनिसका पहिलो वरीयताका खेलाडी हुन् पोखराका प्रदीप खड्का । टेनिसमै १५ वर्षको करियर पूरा गरेका प्रदीपको खेल जीवनको सुरुवात विसं २०६५ देखि अघि बढेको हो । नवौँ राष्ट्रिय खेलकुद प्रतियोगितामा उनले तीन स्वर्ण पदक जिन्न सफल भएका थिए । ‘मेन्स सिंगल’, ‘मेन्स डबल’ र ‘टिम इभेन्ट’मा स्वर्ण पदक जितेका थिए ।

यसैगरी, खड्काले सिटिजन बैंक ओपन टेनिस प्रतियोगिताको पुरुष एकल र डबल्समा समेत स्वर्ण पदक हात पारेका थिए । पोखरा स्पोर्टस् अवार्डमा वर्ष खेलाडी पुरुषसहित वर्ष खेलाडी महिला, लाइफटाइम अचिभमेन्ट अवार्ड, वर्ष उत्कृष्ट प्रशिक्षक, वर्ष उदीयमान खेलाडी, वर्ष उत्कृष्ट खेलकुद संघसंस्था वा क्लब र वर्ष उत्कृष्ट खेल पत्रकार अवार्ड गरेर कूल सातवटा विधामा अवार्ड प्रदान गरिने मञ्चका महासचिव राजाराम पौडेलले बताए ।

वर्ष उत्कृष्ट उदीयमान खेलाडी र वर्ष उत्कृष्ट प्रशिक्षकतर्फका विजेताले नगद ३५ हजारको साथमा ट्रफी पुरस्कार पाउने छन् । ‘लाइफटाइम अचिभमेन्ट अवार्ड’ बक्सिङका प्रशिक्षक विद्या प्रसाद मर्सानीलाई प्रदान गर्ने घोषणा मञ्चले गरिसकेको छ । मर्सानीलाई चाँदीको करुवा, ट्रफी, ताम्रपत्र र दोसल्ला सम्मान गरिनेछ ।