एजेन्सी, २१ वैशाख । अर्जेन्टिनी स्टार स्ट्राइकर लियोनल मेस्सीले सिजनको अन्त्यसँगै फ्रेन्च लिग वान पेरिस सेन्ट जर्मेन (पिएसजी) छोड्ने लगभग निश्चित भएको छ ।

विश्वकप विजेता मेस्सी र क्लब अर्को वर्षसम्मका लागि सम्झौता लम्ब्याउने सैद्धान्तिक सहमतिमा पुगेका थिए । तर, अहिले भने क्लब र मेस्सी दुवै सम्झौतामा हस्ताक्षर गर्न अनइच्छुक देखिएका छन् ।

आर्थिक समस्याका कारण क्लबले युरोपको शीर्ष स्तरमा प्रतिस्पर्धा गर्न सक्छ भन्नेमा मेस्सी सहमत नभएको बताइएको छ । यस्तै, क्लबले युवा खेलाडीमा लगानी गर्न चाहेको अन्तर्राष्ट्रिय सञ्चारमाध्यमले जनाएका छन् ।

सन् २०२१ मा मेस्सीले पिएसजीसँग २ वर्षको सम्झौता गरेका थिए । त्यसबेला सम्झौतामा १ वर्ष नवीकरण गर्न सक्ने सर्त सम्झौतामा राखिएको थियो । क्लबले केही दिनअघि बिना जानकारी साउदी अरेबियाको भ्रमणमा गएको भन्दै मेस्सीलाई २ साताका लागि निलम्बन गरेको थियो ।

विभिन्न समाचारलाई आधार मान्ने हो भने मेस्सी साउदी अरेबियन क्लब जाने तयारीमा छन् । साउदी सरकार र मेस्सीबीच विश्व कीर्तिमानी रकममा सहमति हुने विषयमा छलफल भइरहेको उल्लेख गरिएको छ ।

क्रिस्टियानो रोनाल्डो अहिले साउदीकै क्लब अल नासारमा आबद्ध छन् ।