काठमाडौँ, २४ वैशाख । स्पेनिस महारथी रियल मड्रिडले ९ वर्षपछि कोपा डेल रेको उपाधि उचालेको छ । रियलले स्पेनिस ला लिगा प्रतिद्वन्द्वी ओसासुनालाई फाइनलमा २–१ गोलले हराउँदै २०औँ पटक कोपा डेल रे च्याम्पियन बनेको हो ।

सेभियास्थित स्तादियो डे ला कार्तुकामा भएको खेलमा ओसासुनालाई २–१ ले पराजित गर्दै २०१४ पछि कोपा डेल रे च्याम्पियन बनेको हो । मड्रिडलाई उपाधि जिताउन ब्राजिलियन विङ्गर रोड्रिगोले गोल गरे । ओसासुनाका लुकास टोरोले एक गोल फर्काए ।

मड्रिडलाई अग्रता लिन १०६ सेकेन्डको समय लागेको थियो । खेलको दोस्रो मिनेटमै रोड्रिगोले गोल गरेका थिए । रोड्रिगोले गरेको यो गोल स्पेनिस कपको फाइनलमा १७ वर्षमा सबैभन्दा छिटो भएको गोल हो ।

५८औँ मिनेटमा लुकास टोरेले गोल गर्दै खेललाई १–१ गोलको बराबरीमा ल्याए । त्यसपछि ७०औँ मिनेटमा रोड्रिगोले व्यक्तिगत र टोलीका लागि दोस्रो गोल गर्दै मड्रिडलाई २–१ को दिलाए । मड्रिडसँगको हारसँगै ओसासुना क्लबको १०३ वर्षको इतिहासमा पहिलो उपाधिबाट बञ्चित बन्यो ।

यो जितले आगामी साता युइएफए च्याम्पियन्स लिगअघि मड्रिडको मनोबल उच्च बनेको छ । साथै बेन्जेमाले मड्रिडबाट आफ्नो उपाधि संख्या २५ पुर्‍याएका छन् ।

मड्रिडले यसअघि सन् १९०५, १९०६, १९०७, १९०८, १९१७, १९३४, १९३६, १९४६, १९४७, १९६२, १९७०, १९७४, १९७५, १९८०, १९८२, १९८९, १९९३, २०११ र २०१४ मा कोपा डेल रेको उपाधि जितेको थियो ।