सिन्धुली । सिन्धुलीको कमलामाई नगरपालिका २ स्थित चियाबारीका अग्निपिडित परिवारलाई राहत जुट्ने क्रम जारी छ । अग्निपिडितलाई राहत जुटाउन जिल्लाका युवाहरु अग्रपंक्तिमा देखिएका छन् ।

गत बिहिबार र्यापर प्रिन्स राजको टोलीले ‘चियाबारी राहत कोष’ मा हालसम्मकै धेरै रकम सहयोग गरेको छ । प्रिन्सको समूहले अग्निपिडित परिवारलाई ७० हजार रुपैँया सहयोग गरेको हो । सहयोग रकम हस्तान्तरण गर्दै र्यापर प्रिन्सले युवा व्यवसायी मनोज थापा, बिकि शाह, अदनान शाह, रोशन कार्की, गायक सपन श्रेष्ठ र राष्ट्रिय युवा संघका उपाध्यक्ष पुष्प श्रेष्ठलाई रकम जुटाउन सहयोग गरेकोमा धन्यवाद दिएका छन् ।

गायन क्षेत्रमा सक्रिय प्रिन्सले आफ्नो कर्मथलो जहाँ भएपनि जन्मथलो सिन्धुलीनै भएकाले जिल्लामा पिडा पर्दा आफूलाई दुख्ने गरेको बताए । ‘आगलागीको घट्नाले स्तब्ध बनायो । तत्कालै एउटा समूह बनाएर राहत संकलनमा जुट्यौँ । राहत लिएर सिन्धुली आएको छौँ ।’ उहाँले भन्नुभयो, ‘तन जहाँ भएपनि मन भने सधैँ सिन्धुलीमा रहने छ । राहत जुटाउन सहयोग गर्ने सबैलाई धन्यवाद ।’