काठमाडौं २८ बैशाख । पाकिस्तानको सर्वोच्च अदालतले निवर्तमान प्रधानमन्त्री इमरान खानको पक्राउलाई गैरकानुनी भन्दै रिहाइ गर्न आदेश दिएको छ।

पाकिस्तानी सञ्चारमाध्यमहरूले जनाएअनुसार पाकिस्तानका प्रधानन्यायाधीश उमर अता बान्डिअलसहित तीन न्यायाधीशको इजलासले आज साँझ खानलाई पक्रिनु गैरकानुनी भएको भन्दै रिहाइ गर्न आदेश दिएको हो।

यसअघि आजै दिउँसो उक्त इजलासले एक घन्टाभित्र खानलाई अदालतमा उपस्थित गराउन नेसनल एकाउन्टबिलिटी ब्युरोलाई आदेश दिएको थियो।

खानलाई गैरकानुनी तरिकाले पक्राउ गरिएको भन्दै उनका वकिलले सर्वोच्चमा रिट दिएका थिए। पूर्वप्रधानमन्त्री खानलाई गत मंगलबार इस्लामाबादस्थित उच्च अदालतबाहिरबाट प्रहरीले पक्राउ गरेको थियो।

अब खान भोलि इस्लामाबादस्थित उच्च अदालतमा उपस्थित हुनेछन्। त्यति वेलासम्म उनी प्रहरी सुरक्षामा रहनेछन्। गत वर्ष प्रधानमन्त्रीबाट हटेपछि उनीविरूद्ध विभिन्न मुद्दाहरू लगाइएको थियो। उनीविरूद्ध भ्रष्टाचार, आतंकवाद, अदालतको मानहानी, दंगा गरेको आरोप छ।

खान पक्राउ परेपछि पाकिस्तानका विभिन्न क्षेत्रमा हिंसात्मक प्रदर्शन भइरहेका छन्। हिंसात्मक प्रदर्शनका क्रममा भएका झडप तथा प्रहरीका गोली लागेर अहिलेसम्म ४२ जनाको मृत्यु भइसकेको छ। सयौँ घाइते भएका छन्।

पाकिस्तानी सुरक्षाकर्मीले खान नेतृत्वको पार्टी पिटिआईका तीन हजारभन्दा बढी नेता–कार्यकर्तालाई गिरफ्तार गरेको छ।