काठमाडौँ, ९ जेठ । नक्कली भुटानी शरणार्थी प्रकरणमा पक्राउ परेका १६ जनलाई थुनामा राख्न मंगलबार पुनः म्याद थप गरिने भएको छ । मुद्दा दायर नहुँदासम्म उनीहरूलाई थुनामा राख्न अदालतबाट आज अनुमति लिइने छ ।

नेपाली नागरिकलाई भुटानी शरणार्थी बनाएर अमेरिका पठाउने भन्दै रकम ठगी गरेको आरोपमा प्रहरीले अनुसन्धान सुरू गरेको थियो । यो प्रकरणमा योजनाकार एवम् बिचौलिया भनिएका केशव दुलाल, सानु भण्डारी, टंक गुरूङ र सागर राईलाई प्रहरीले गएको चैत १२ गते पक्राउ गरेको थियो । उनीहरूको बयान र प्रमाणका आधारमा प्रहरीले यो प्रकरणमा जोडिएका अन्य व्यक्तिहरूलाई पक्राउ गरेको हो ।

नेपाली नागरिकलाई भुटानी शरणार्थी बनाएर विदेश पठाउन संगठित रूपमा सांसद, सरकारी कर्मचारी, बिचौलियालगायत गिरोहरूको समूहले करिब ७ वर्ष अगाडिदेखि प्रक्रिया सुरू गरेको थियो । नेपाली नागरिकलाई विदेशी मुलुक (विशेष गरी अमेरिका) पठाउने आश्वासन लिएर रकम असुल गरिएको प्रमाणहरूबाट पुष्टि हुने उनको भनाइ छ ।

यसैबीच, करिब दुई महिनाको अनुसन्धानपछि प्रहरीले नक्कली भुटानी शरणार्थी प्रकरणको अनुसनधान प्रतिवेदन बुझाएको छ । सोमबार प्रहरीले जिल्ला सरकारी वकिलको कार्यालय काठमाडौँमा प्रतिवेदन पेस गरेको हो ।

उक्त प्रतिवेदन अध्ययन गरेर सरकारी वकिलको कार्यालयले ढिलोमा आउँदो बिहीबारसम्म जिल्ला अदालत काठमाडौँमा मुद्दा दायर गर्नुपर्छ । कार्यालयका सहन्यायाधिवक्ता अच्युतमणि न्यौपानेसहितको ८ जनाको टोलीले अध्ययन तथा अभियोजनको प्रक्रिया अगाडि बढाउने छ ।

यो प्रकरणमा पक्राउ परेका १६ र फरार रहेका १६ जनाविरूद्ध मुद्दा चलाउनुपर्ने प्रहरकिो राय रहेको उनले बताए । उनका अनुसार संगठित अपराधअन्तर्गत भएको ठगी र राज्यविरूद्धको कसुरमा मुद्दा चलाउनुपर्ने राय प्रहरीको छ ।

पक्राउ परेका १६ र फरार १६ जनाबाहेकविरूद्ध पनि प्रमाण भेटिएमा मुद्दा चलाउन मिल्ने गरी अभियोजन दर्ता गरिने उनले जानकारी दिए ।