काठमाडौं ४ असार। भारतको बाह्य गुप्तचर अनुसन्धान र विश्लेषण शाखा (रअ) को नयाँ प्रमुखमा रवि सिन्हा नियुक्त भएका छन् । छत्तीसगढ क्याडरका वरिष्ठ आईपीएस अधिकारी रवि सिन्हालाई मन्त्रिपरिषदको नियुक्ति समितिले सोमबार नियुक्त गरेको हो ।

सन् १९८८ ब्याचका भारतीय प्रहरी सेवा (आईपीएस) अधिकृत सिन्हा मन्त्रिपरिषद् सचिवालयमा विशेष सचिवको रूपमा कार्यरत थिए । अब उनले ३० जुनमा सामन्त गोयलको स्थान लिनेछन् । उनको कार्यकाल २ वर्ष हुनेछ ।

रवि सिन्हा पछिल्लो भाजपा नेतृत्वको सरकार (अटल बिहारी वाजपेयी) को कार्यकालमा पुलिस सेवाबाट रअ मा आएका थिए ।

सिन्हा जम्मु कश्मीर तथा उत्तर पूर्वी राज्यहरूमा चलाईएका कतिपय अपरेसनको नेतृत्व गरिरहेका थिए ।

पाकिस्तान, अफगानिस्तान र चीनमा समेत काम गरेको अनुभव उनीसँग छ। सिन्हा अहिलेका प्रमुख सामन्त गोयलपछिको रअकै दोस्रो वरियताका निर्देशक हुन् ।