मस्को, २१ माघ ।  रुसका लडाकू विमानहरुले आक्रमण गर्दा सिरियामा शनिबार कम्तीमा पनि ३० जना विद्रोही लडाकू मारिएका छन् ।

सिरियाको उत्तरपश्चिमी क्षेत्र इडलिबमा भएको आक्रमणमा परी उनीहरुको मृत्यु भएको रुसको रक्षा मन्त्रालयले शनिबार राति जारी गरेर विज्ञप्तिमा जनाइएको छ ।

त्यस क्षेत्रमा रुसका उच्च क्षमताका हतियारहरु भएका रुसी लडाकू विमानले नै निरन्तर रुपमा आक्रमण गरेको बताइएको थियो ।

“ती आक्रमणमा परी सिरियाको विद्रोही समूह जाभात अल नुसराका ३० भन्दा बढी लडाकू मारिएका छन्,” उक्त वक्तव्यमा जनाइएको छ ।

सिरियाली उक्त विद्रोही समूहले सिरियाको इडलिब क्षेत्रमा रुसको एक युद्धक विमानमा हमला गरेर शनिबार खसालिदिएका थिए ।

उक्त विमानलाई उनीहरुले आक्रमण गरेपछि विमानले अकस्मात अवतरण गरेको थियो । विमानलाई अस्त्र आक्रमणबाट झारेपछि त्यस विमानका चालकको केही समय उक्त सशस्त्र समूहसँग झडप परेको थियो ।

सो विमान खसालेपछि आक्रामक भएको रुसी सेनाले सो आक्रमण गरेको हो । आक्रमण रुसी सेनाले नै गरेको र त्यसमा परी ३० भन्दा बढी लडाकू मारिएको अधिकारवादीहरुले पनि जनाएका छन् । (रासस÷सिन्ह्वा)