काठमाडौं २३ साउन । नेकपा एमालेका सचेतक महेश बर्तौलाले आजको संसद् सञ्चालन हुने बताएका छन् ।

बालुवाटारमा बसेको सभामुख देवराज घिमिरेसहित तीन दलका शीर्ष नेताको बैठकपछि उनले कुनै सहमति नभए पनि आजको संसद् अघि बढ्ने बताए । उनले आजको बैठकमा गृहमन्त्री नारायणकाजी श्रेष्ठले बोल्न पनि बताए ।

ूसंसद्मा मान्यज्यूहरुले आफ्नो धारणा राख्नुपर्नेछ । बाढी पहिरोको समस्या छ । लम्पी स्किनका विषय छन् । तमाम विषयले सदन चलाउनुपर्ने छ । सरकार आफ्नो अडानमा रह्यो,” उनले भने, “उच्चस्तरीय छानबिन समिति बनाउन तयार नभएको स्थिति हुँदाहुँदै पनि आज गृहमन्त्रीज्यूले केही कुरा बताउँछु भन्ने सदनमा राख्ने हुँदा आज बैठक अघि बढाउने । गृहमन्त्रीको जवाफ सुन्छौँ । आज बैठक अघि बढ्छ ।”

उनले सरकार एमालेलाई थकाउने र भ्रम छर्ने रणनीतिमा देखिएको बताए । “उहाँहरुको समग्रतामा हेर्दा प्रमुख प्रतिपक्षीलाई गलाउने, थकाउने र केही निचोड नदिई जनताको बीचमा भ्रम छर्दिने,” उनी भन्छन् ।

बैठक दिउँसो ३ बजेका लागि बोलाइएको छ ।