काठमाडौं, २१ भदौ । प्रतिनिधि सभाका सभामुख देवराज घिमिरेले नेपाली कांग्रेस सहमहामन्त्री एवम् संविधान सभा सदस्य महेन्द्र यादवमाथि भएको आक्रमणबारे संसदलाई जानकारी गराउन सरकारलाई रुलिङ गरेका छन्।

बिहीबार बसेको प्रतिनिधि सभा बैठकको आकस्मिक, शून्य र विशेष समयमा बोल्ने सांसदहरुले ती घटनाबारे ध्यानाकर्षण गराएपछि उनले सरकारलाई रुलिङ गरेका हुन्।

यादवलाई खुकुरी प्रहारको घटना र कान्ति बाल अस्पतालमा उपचार अभाव ज्यान गुमाएकी ५ वर्षीया बालिकाबारे सम्पूर्ण जानकारी गराउन घिमिरले सरकारलाई निर्देशन दिएका हुन्।

‘आजको आकस्मिक, शुन्य र विशेष समयमा कान्ति बाल अस्पतालमा एक जना ५ वर्षीया बालिकाको मृत्यु भएको र संविधानसभा सदस्य एवं कांग्रेस सहमहामन्त्री यादवमाथि भएको आक्रमणको विषयमा गम्भीर कुरा छन्। यी विषयमा सदनलाई जानकारी गराउन सरकारलाई निर्देश गर्दछु’, उनले भनेका छन्।

बैठकमा सत्ता र प्रतिपक्षी सांसदहरुले ती दुवै अपराधिक घटनामा संलग्न दोषीहरुमाथि कडा कारबाही गर्न सरकारसँग माग गरेका थिए।