काठमाडौ २६ भदौ । सुवासचन्द्र नेम्वाङको शव श्रद्धाञ्जली अर्पणका लागि नेकपा एमालेको पार्टी कार्यालय च्यासलमा राखिएको छ । त्रिवि शिक्षण अस्पताल महाराजगञ्जबाट नेपाली सेनाको टोलीले नेम्वाङको शव च्यासल पुर्याएको हो ।घरको शौचालयमा राति १ बजेतिर बेहोस अवस्थामा भेटिएका नेम्वाङलाई १स्५० बजे त्रिवि शिक्षण अस्पताल पुर्‍याइएको थियो । चिकित्सकले उनलाई मृत घोषणा गरेका थिए ।

नेम्वाङको निधनको खबर पाएलगत्तै प्रधानमन्त्री पुष्पकमल दाहाल प्रचण्ड, सभामुख देवराज घिमिरे, नेकपा एमालेका अध्यक्ष केपी शर्मा ओलीलगायतका नेताहरु अस्पताल पुगेका थिए । मन्त्रिपरिषद्को बैठकले नेम्वाङलाई राजकीय सम्मान दिने निर्णय गरेको छ ।

सरकारले राजकीय सम्मान दिने निर्णय गरेसँगै शव व्यवस्थापनको जिम्मा नेपाली सेनाले लिएको छ । नेम्वाङको शव भोलि दिउँसोसम्म पार्टी कार्यालयमा राख्ने एमालेले जनाएको छ । श्रद्धाञ्जली अर्पण गर्न नेता–कार्यकर्ताहरु एमाले केन्द्रीय कार्यालयमा भेला भएका छन् ।संविधान सभाका अध्यक्ष एवम् नेकपा एमालेका उपाध्यक्ष नेम्वाङको ह्यदयघातका कारण गएराति निधन भएको हो ।