काठमाडौं, २६ भदौ । नाडा अटो मोबाइल एसोसियसनका अध्यक्ष ध्रुव थापाले अटो व्यवसायलाई विलासी बस्तुको रूपमा हेर्न नहुने बताएका छन् ।

मंगलबारदेखि काठमाडौंको भृकुटीमण्डपमा सुरू भएको नाडा अटो सो २०२३ को उद्घाटन समारोहमा बोल्दै थापाले यस्तो बताएका हुन् ।

अटो मोबाइल व्यवसायले राज्यलाई राजस्वमा ठूलो सहयोग गर्ने भन्दै यसलाई सुनचाँदी व्यवसाय जस्तो विलासिताको स्थानमा राख्न नहुने उनको भनाइ छ ।

सेयर मार्केट, अटो व्यवसाय र घरजग्गा कारोबारले अर्थतन्त्रमा प्रत्यक्ष प्रभाव पार्छ । यसलाई कडाइँ गरेर पनि अहिले अर्थतन्त्रमा समस्या देखिएको हो, उनले भने, मन्दीले अटो व्यवसायमा समस्या पारेको छ । अटो व्यवसायलाई विलासितामा राख्नु हुँदैन ।

विद्युतीय गाडी उत्पादन तथा आयात गर्न छुट्टै नीति आवश्यक रहेको पनि उनले बताए । हायर प्रचेज कर्जा जोखिम भार ७५ प्रतिशत नै कायम गर्न आग्रह गरे ।

कर्जा निष्क्रियसम्बन्धी हालै भएको व्यवस्था संशोधन हुन आवश्यक रहेको थापाको भनाइ छ ।

प्रदर्शन केन्द्र नहुँदा ठूला गाडी प्रर्दशनीमा समस्या परेको बताए । भृकुटीमण्डपमा ठाउँ सानो भयो । हामीले ठूला गाडी प्रदर्शन गर्न सकेनौं । यसमा सरकारको ध्यान जाओस्, उनले भने ।