काठमाडौं, १४ असोज । सुन तस्करी प्रकरणको छानबिनका निम्ति आयोग घोषणाको तयारी गरिएको छ । आज दिउँसो १ बजे बस्ने प्रतिनिधिसभा बैठकअघि नै आयोग घोषणा गर्ने तयारी गरिएको नेकपा (एमाले)का सचेतक महेश बर्तौलाले जानकारी दिए ।आयोगको कार्यादेशका विषयमा आजै सहमति गर्ने सत्तासाझेदार दल र एमाले नेताको तयारी छ ।

आइतबारको संसद् बैठकमा प्रधानमन्त्री पुष्पकमल दाहाल ‘प्रचण्ड’ले सम्बोधन गर्नेछन् ।“आज नै आयोग निर्माण हुने गरी कार्यादेश तयार गर्ने सहमतिको नजिक पुगेका छौँ । छलफलचाहिँ जारी छ । आजको संसद् बैठकमा प्रधानमन्त्रीले बोल्नुहुनेछ,” उनले  भने, “संसद्को बैठकपूर्व नै आयोग घोषणा गर्ने सहमतिको तयारी छ ।”

आज बिहान बालुवाटारमा प्रधानमन्त्री प्रचण्ड र एमाले अध्यक्ष केपी शर्मा ओलीसहितका नेताहरूबीच छलफल भएको थियो । ओली बालुवाटारबाट बाहिरिएका छन् । राष्ट्रिय मान्यताप्राप्त दलका नेताहरूबीच बालुवाटारमै छलफल गरिँदै छ ।