काठमाडौं, १४ असोज । प्रधानमन्त्री पुष्पकमल दाहालले मन्त्रिपरिषद्को आकस्मिक बैठक बोलाएका छन् । प्रधानमन्त्रीको सचिवालयका अनुसार पेट्रोलियम पदार्थको मूल्यबारे पुनर्विचार गर्नका लागि मन्त्रिपरिषद्को आकस्मिक बैठक बस्न लागेको हो ।

पेट्रोलियम पदार्थ र ग्यासको मूल्य शनिबार वृद्धि भएको थियो । उक्त मूल्य पुनर्विचार गर्नका लागि प्रधानमन्त्री दाहालले आइतबार दिउँसो साढे १२ बजे मन्त्रिपरिषद्को आकस्मिक बैठक बोलाएका हुन् ।प्रधानमन्त्रीको सचिवालयले भनेको छ, सरोकारवाला निकायहरूको समेत सुझावमा नेपाल आयल निगमले केहि महिना अघि देखी स्वचालित मूल्य प्रणाली लागू गरेको थियो । तर, केही समय यता अन्तर्राष्ट्रिय बजारमा पेट्रोलियम पदार्थ (ग्याससमेत) मा मूल्यवृद्धि भएको र सोही अनुसार नेपाल आयल निगमले मुल्यवृद्धि गरेको देखियो ।

नेपाल आयल निगमले सरकारको राजनीतिक नेतृत्वसँग परामर्श गरेर पछिल्लो निर्णय नलिएको प्रधानमन्त्रीको सचिवालयले जनाएको छ । त्यसप्रति प्रधानमन्त्रीको ध्यानाकर्षण भएको उल्लेख छ । नेपाली जनताको कमजोर क्रयशक्ति, चाडबाड मुखैमा आएको अवस्थालाई ख्याल गर्दै सम्बन्धित निकायले सरकारको राजनैतिक नेतृत्वसँग परामर्श गरेर मात्र निर्णय गर्नु पर्नेमा त्यो नभएकोमा सम्माननीय प्रधानमन्त्रीज्यूको गम्भीर ध्यानाकर्षण भएको छ,ु प्रधानमन्त्रीको सचिवालयले भनेको छ, यस विषयमा सम्बन्धित जिम्मेवार निकायलाई बोलाई छलफल गरी १२÷३० मा आकस्मिक मन्त्रिपरिषद् बैठक बोलाउनु भएको छ ।मूल्यवृद्धिलाई लिएर राजनीतिक दलहरू र सर्वसाधारणले सरकारको आलोचना गरिरहेका छन् ।