काठमाडौं, १८ असोज । विद्युतीय सिगरेट भेपमार्फत गरिएको नौ किलो सुन तस्करी प्रकरणको अनुसन्धान अन्तिम चरणमा पुर्‍याइएको छ । भेप प्रकरणमा जोडिएका नेकपा माओवादी केन्द्रका उपाध्यक्ष कृष्णबहादुर महराका छोरा राहुललाई गएको भदौ १३ गते पक्राउ गरेर नेपाल प्रहरीको केन्द्रीय अनुसन्धान ब्युरो सीआईबीले अनुसन्धान थालेको थियो ।

सो प्रकरणको अनुसन्धान अन्तिम चरणमा पुगेको सीआईबीका प्रवक्ता एवं एसएसपी दिनेश आचार्यले जानकारी दिए । सीआईबी स्रोतका अनुसार सो प्रकरणमा राहुललाई मतियारका रूपमा मुद्दा चलाउनुपर्ने देखिएको छ ।

सोही प्रकृतिको अनुसन्धान प्रतिवेदन तयार पारिएको सीआईबी स्रोतको भनाइ छ । “तस्करीमा प्रत्यक्ष संलग्न देखिँदैन, तर तस्करी गर्ने समूहलाई सहयोग गरेको देखिन्छ । त्यसकारण राहुललाई मतियारको रूपमा मुद्दा चलाउनुपर्ने निष्कर्ष हाम्रो छ,” स्रोतले  भन्यो ।

सीआईबीले पूर्वसभामुख समेत रहेका महरासँग सोमबार कागजी बयान लिएको थियो । महराको हकमा सरकारी वकिल कार्यालयसँगको परामर्शमा मात्र अघि बढ्ने सीआईबीको तयारी छ ।

भेपमार्फत नौ किलो सुन तस्करी गर्ने समूहका मुख्य व्यक्ति चिनियाँ नागरिक दाओजिन वाङ भएको प्रहरीको अनुसन्धानमा खुलेको थियो । उनी फरार छन् । सीआईबी टोलीले उनका गाडी चालक लोकन्द्र पौडेललाई समेत पक्राउ गरेर अनुसन्धान गरिरहेको छ ।

यसअघि, उक्त सुन चोरी प्रकरणमा समेत सीआईबीले अनुसन्धान गरेको थियो । भेपमा भएको सुन चोरी प्रकरणमा जोडिएका विमानस्थल भन्सारका नासु रेवन्त खड्कासहित सुरक्षा गार्ड निर्मलकुमार विक, भन्सार एजेन्ट दिनेश बस्नेत, व्यापारी वेदप्रकाश अग्रवाल र साहेवराव पाण्डुरङ मरगलेलाई जिल्ला अदालत काठमाडौंले पुर्पक्षका लागि जेल चलान गरेको छ ।

सो सुन चोरी प्रकरणमै जोडिएका दिपेश बस्नेत, गोपाल सुवेदी र रामकेशव थापा फरार छन् ।