काठमाडौं २ कात्तिक । गैरआवासीय नेपाली संघ (एनआरएनए) को नयाँ नेतृत्व चयनका लागि आज (बिहीबार) मतदान भइरहेको छ । मंगलबारदेखि सुरु भएको एनआरएनएको ११ औं महाधिवेसनमा आज नयाँ पदाधिकारी चयनका लागि मतदान भइरहेको हो ।

काठमाडौंमा भइरहेको महाधिवेसनमा आज बिहान १० बजेदेखि साँझ ६ बजेसम्म मतदान हुँदैछ । विदेशमा रहेका एनआरएनले अनलाइनबाटै मतदान गर्ने व्यवस्था मिलाइएको छ । अनलाइनबाट मतदान गर्नेले गएराति १२ बजेदेखि नै मतदान गरिरहेका छन् । उनीहरुले राति १२ बजेसम्म मतदान गर्न पाउने छन् ।

एनआरएनको अध्यक्ष पदमा तीन जना उमेदवारबीच प्रतिस्पर्धा हुँदैछ । अध्यक्ष पदका लागि निवर्तमान अध्यक्ष डा. बद्री केसी, निर्वतमान उपाध्यक्ष राजेन्द्रकुमार (आरके)शर्मा र निवर्तमान उपाध्यक्ष महेशकुमार श्रेष्ठ बीच प्रतिस्पर्धा हुँदैछ ।

महासचिवका उमेदवार गौरीराज जोशीले भने, विदेशमा रहनुभएका मतदाताले मतदान गरिरहनुभएको छ । उहाँहरुले आफ्नो विवेक प्रयोग गरिरहनुभएको छ । मैले सबै मतदातासँग फेरि पनि आफ्नो विवेक प्रयोग गरेर सही नेतृत्त्व चयन गर्नुहोस् भन्ने धारणा राखेको छु ।”

४ हजार २२७ मतदाताले एक जना अध्यक्ष, एक महिला र एक युवासहित आठ उपाध्यक्ष, एक महासचिव, ६ सचिव र कोषाध्यक्ष लगायत ७४ जना पदाधिकारी चयन गर्नेछन् । ६ जना उपाध्यक्षका लागि १८ जनाको उमेदवारी रहेको छ ।