काठमाडौं, २१ कात्तिक । डिउटीमा रहेका चिकित्सक र नर्समाथि कुटपिट एवं दुर्व्यवहारको घटनालाई लिएर पाटन अस्पतालका चिकित्सक आन्दोलनमा उत्रिएका छन् । फ्याकल्टी, आवासीय, इन्टर्नसहितका चिकित्सक आन्दोलनमा उत्रँदा मंगलबार अस्पतालमा आकस्मिकबाहेकका सेवा ठप्प भएको छ ।

गएको शनिबारको घटनाका दोषीमाथि कारबाहीको माग गर्दै उनीहरूले अस्पताल प्रांगणमा प्रदर्शन गरेका हुन् । “हामीले सेवा प्रभावित गर्न खोजेका होइनौँ, पटक–पटक हामीमाथि आक्रमण र दोषीलाई कारबाही नभएपछि काममा खटिन नसकेर आन्दोलनमा आएका हौँ,” मेडिसिन विभागमा कार्यरत आवासीय चिकित्सक डा। सञ्जय बरालले  भने ।

शनिबार पाटन अस्पतालको ज्येष्ठ नागरिक वार्डमा उपचाररत दुई बिरामीको २० मिनेटको अन्तरालमा मृत्यु भएको थियो । त्यसपछि मृतकका आफन्तले डिउटीमा खटिएका चिकित्सकमाथि कुटपिट गरेका थिए ।

औषधि दिने क्रममा लापरबाही गरिएको भन्दै आफन्तले दुई आवासीय चिकित्सकको टाउकामा मुक्का प्रहार र धकेलाधकेल गरेको सीसीटीभी फुटेजमा देखिएको छ । सोही क्रममा इन्जेक्सन दिने नर्समाथि पनि मृतकका आफन्तले दुर्व्यवहार गरेको अस्पतालले जनाएको छ ।

मृतक क्रमशः ८६ र ६८ वर्षका निमोनियाका बिरामी थिए । ८६ वर्षीया वृद्धाको शव सोही दिन परिवारले बुझेको थियो । ६८ वर्षीय पुरुषको शव त्रिवि शिक्षण अस्पतालमा पोस्टमार्टम गरी रिपोर्ट अध्ययनका क्रममा रहेको पाटन अस्पताल प्रशासनले जानकारी गराएको छ । ती वृद्धको शव समेत परिवारले बुझिसकेको छ ।

उनीहरूका उपचारका क्रममा प्रयोग गरिएको औषधि परीक्षणका निम्ति औषधि व्यवस्था विभागमा पठाइएको अस्पतालले जनाएको छ ।

पाटन अस्पतालमा आइतबार र बिहीबार अरू दिनभन्दा भीड हुने गरेको छ । आइतबार र बिहीबार ओपीडीमा बिरामीको संख्या एक हजार ८०० सम्म पुग्ने गरेको अस्पतालको तथ्यांक छ ।