काठमाडौं, २१ कात्तिक । सत्ता गठबन्धनको प्रमुख घटक नेपाली कांग्रेसले जाजरकोट भूकम्पपछि राहत, उद्धार र पुनर्स्थापना कार्य प्रदेश र स्थानीय तहको नेतृत्व र संघीय सरकारको अनुगमन तथा सहजीकरणमा गर्दा उपयुक्त हुने सुझाव दिएको छ ।कांग्रेस सभापति शेरबहादुर देउवासहित पदाधिकारीहरुले मंगलबार विहान प्रधानमन्त्री पुष्पकमल दाहाललाई भेटेर भूकम्प प्रभावितलाई राहत, उद्धार र पुनर्स्थापनाको कार्य प्रदेश र स्थानीय तहको नेतृत्वमा गर्दा उपयुक्त हुनेसहित २१ बुँदे सुझाव दिएका हुन् ।

कांग्रेसले भूकम्पपछि केन्द्र र स्थानीय सरकारले सक्रियतापूर्वक निर्वाह गरेको भूमिकाको प्रशंसा गरेको छ भने भूकम्प पश्चातको राहत, पुनर्स्थापना, पुनर्निर्माण कार्यलाई थप व्यवस्थित गर्न आवश्यक रहेकोमा सुझाव राखेको छ ।

मंगलबार बिहान कांग्रेस सभापति देउवासँगै महामन्त्रीद्वय विश्वप्रकाश शर्मा र गगन थापा, प्रचार विभाग प्रमुख मीन विश्वकर्मा र केन्द्रीय सदस्य गोविन्द पोखरेल बालुवाटारस्थित प्रधानमन्त्रीको निवास पुगेका थिए । भेटमा कांग्रेस सभापति देउवाले कांग्रेसका तर्फबाट भूकम्पपीडितकालागि तत्काल उद्धार र राहतका लागि एकमुष्ट ५० लाख रुपैयाँको चेक हस्तान्तरण गरेका थिए ।

साथै, कांग्रेसले भूकम्प प्रभावित क्षेत्रमा त्रिपाल, खाद्यान्न, औषधि, लत्ता(कपडाहरु युद्धस्तरमा उपलब्ध गराउन प्रधानमन्त्री प्रचण्डलाई भनेको छ । यी अत्यावश्यक सामग्रीहरु अभाव हुन नदिन स्थानीय तहको नेतृत्वमा, सुरक्षा निकाय, निजी क्षेत्र, स्थानीय रुपमा कृयाशिल राजनैतिक दलहरु र संघ(संस्था सम्मिलित ‘सहजीकरण साझा संयन्त्र’ निर्माण गर्न सुझाव समेत दिएको छ ।

त्यस्तै, आउँदो हिउँदलाई विचार गरी अस्थायी आवास जतिसक्दो चाँडो व्यवस्था गर्नुपर्ने कांग्रेसको सुझाव छ । कांग्रेसले तत्कालीन र अल्पकालीन काम १२ बुँदामा र पुनर्निर्माणका काममा ९ बुँदामा सरकारलाई सुझाव दिएको छ ।