काठमाडौँ, २२ कात्तिक । स्वास्थ्य तथा जनसंख्या मन्त्रालयमा यतिखेर काज फिर्ता भएका कर्मचारीको संख्या बढेको छ । वाग्मती प्रदेशबाट सरकारले काज फिर्ता पठाएका ३६ मध्ये अधिकांश कर्मचारी यतिखेर पदस्थापनररिक्त दरबन्दी खोज्दै संघीय मन्त्रालय आइपुगेका छन् ।

कतिपय कर्मचारीको हाजिरी गरेर घाम ताप्ने दैनिकी बनेको छ भने कतिले हाजिर गर्न समेत पाएका छैनन् ।

वाग्मती प्रदेश मुख्यमन्त्री तथा मन्त्रिपरिषद्को कार्यालयले गत असोज ३० गते मुख्यमन्त्री स्तरीय निर्णय गर्दै ३६ जना काजका कर्मचारी फिर्ता पठाएको थियो ।

यसबीचमा दसैँ बिदा परेकाले त्यसपछि भने उनीहरू रिक्त दरबन्दी खोज्दै मन्त्रालय आइपुगेका छन् । मन्त्रालयमा हाजिरी गराइए पनि तत्काल उनीहरूको व्यवस्थापनमा कठिनाइ भएको मन्त्रालयका प्रशासन महाशाखा प्रमुख तुलसीनाथ गौतम बताउँछन् ।

मन्त्रालयले गत जेठ २५ गते सबै स्थानीय तहहरूलाई परिपत्र गर्दै समायोजनका क्रममा काजमा रहेका कर्मचारीलाई साउन १ गतेदेखि अनिवार्य फिर्ता हुन निर्देशन दिएको थियो ।

वाग्मती सरकारले सोही पत्रका आधारमा काज फिर्ता गरिएको व्यहोराको पत्र कर्मचारीलाई दिएको छ ।