फागुन १ – दक्षिण अफ्रिकाको सत्तारुढ दल अफ्रिकन नेशनल कंग्रेसले भ्रष्टाचारको आरोप लागेका राष्ट्रपति जेकोब जुमाको राजीनामा माग गरेका छन् ।

गएराति अबेरसम्म चलेको बैठकमा अधिकांश सदस्यले राष्ट्रपति जुमाको राजीनामा माग गरेको तर यस सम्बन्धमा आधिकारिक वक्तव्य नआएको बीबीसीले जनाएको छ । छलफल मंगलबार पनि हुने जनाइएको छ ।

गएको डिसेम्बरमा पार्टीको प्रमुखमा सिरिल रामापोसा चुनिएपछि जुमाको राजीनामाको कुरा चल्दै आएको थियो । जुमाको राजिनामाबारे छलफल गर्न अफ्रिकन नेसनल कांग्रेस एएनसीका १ सयभन्दा बढी वरिष्ठ नेताहरूले १३ घण्टा बैठक गरेका थिए ।

बैठकपछि नेताहरुले औपचारिक प्रतिक्रिया नदिए पनि स्थानीय सञ्चारमाध्यमले नेताहरुको भेलाले जुमालाई राजीनामा दिन औपचारिक रूपमा आग्रह गरेको बीबीसीले उल्लेख गरेको छ ।

७५ वर्षीय जुमा सन् २००९ पछि राजनीतिको नेतृत्व तहमा सक्रिय रहे पनि उनलाई पटक पटक भष्ट्राचारको आरोप लाग्दै आएको छ । सन् २०१६ मा जुमाले नीजी घरमा सरकारी पैसा खर्च गरेर फिर्ता नगर्दा अफ्रिकाको सबैभन्दा उच्च अदालतले जुमाले संविधानको उल्लङ्घन गरेको जनाएको थियो ।