काठमाडौँ १२ पुस । राष्ट्रिय स्वतन्त्र पार्टी का सभापति रवि लामिछानेले बुटवलको सुप्रिमो सहकारीसँग आफ्नो कुनै संलग्नता नरहेको बताएका छन् । उनले उक्त सहकारीमा आफ्नो कुनै खाता नभएको आफू बचतकर्ता पनि नभएको बताएका छन् ।

सामाजिक सञ्जालमा लेख्दै लामिछानेले कान्तिपुर दैनिकले सहकारी घोटालामा रवि लामछिानेको प्रत्यक्ष संलग्नता भन्ने समाचारको खण्डन गर्दै लामिछानेले यस्तो बताएका हुन् ।

उनले लेखेका छन्, ‘कान्तिपुरले सुप्रिम सहकारीको रकम गोरखा मिडिया नेटवर्कको खातामा सिधै ट्रान्सफर गरियो र त्यो काम मैले गरेको आरोप लगाएको छ र त्यसमा अक्षर त्यति प्रष्ट नभएको एउटा डिपोजिट स्लिपलाई प्रमाण देखाउन खोजिएको छ। मेरो प्रत्यक्ष संलग्नता हुन सुप्रिम सहकारीमा मेरो खाता हुनुपर्यो, अनि मैले त्यसका बचतकर्ताको रकम त्यसमा सारेको हुनुपर्यो, त्यसपछि त्यो सहकारीको खातामा रहेको रकम मैले गोरखा मिडिया नेटवर्कको बैँक खातामा सारेको हुनुपर्यो।’

‘समाचारमा नै सहकारीको रकम ट्रान्सफर गर्न सहकारीका कर्मचारीलाई लगाइएको लेखिएको छ। यसबाटै म यसमा प्रत्यक्ष संलग्न नरहेको पुष्टि हुन्छु,लामिछानेले भनेका छन् ।

फगत् एउटा डिपोजिट स्लिपमा मेरो पनि नाम कसैले लेखेकै भरमा मेरो प्रत्यक्ष संलग्नता भएको ठूलो हेडलाइनसहितको समाचार बन्न यस्ता सामान्य आधारभूत तथ्यमा समेत विचार गरिएन। कसैले कैलाश सिरोहियाको नाममा कसैको बैँक खातामा रकम जम्मा गरिदियो भने दोषी त्यो मान्छे हुन्छ कि कैलाश सिरोहिया? फेरि बैँकले एक लाख रुपैयाँभन्दा बढी नगद खातामा जम्मा गर्दा डिपोजिट गर्नेको परिचय खुल्ने कागजात पनि माग्ने कुरा त सबैलाई थाहै भएको कुरा हो।