काठमाडौं १७ पौष । इजरायलले गाजामा नरसंहार गरेको आरोपमा दक्षिण अफ्रिकाले इजरायलका विरुद्ध संयुक्त राष्ट्रसंघीय अदालतमा मुद्दा दायर गरेको छ । मुद्दाको सुनुवाइमा नेदरल्यान्ड्सको हेगस्थित संयुक्त राष्ट्रसंघको अन्तर्राष्ट्रिय अदालत आईसीजेमा उपस्थित हुने निर्णय गरिएको इजरायली समाचार वेबसाइट वाइनेटले सोमबार उल्लेख गरेको छ ।

इजरायलले नरसंहारविरुद्धको महासन्धिमा हस्ताक्षर गरेको स्वीकार गर्दै त्यहाँका राष्ट्रिय सुरक्षा सल्लाहकार हानेग्बीले कारबाहीको बहिष्कार नगर्ने, तर उपस्थित भई आफूविरुद्धको षड्यन्त्रलाई अस्वीकार गर्ने बताएको वेबसाइटमा उल्लेख छ ।

इजरायली प्रधानमन्त्री बेन्जामिन नेतान्याहूको नेतृत्वमा वरिष्ठ अधिकारीबीचको छलफलअघि नै यो निर्णय लिइएको जनाइएको छ ।

शुक्रबार दायर गरिएको मुद्दामा ‘गाजा स्ट्रिपमा प्यालेस्टाइनीको नरसंहारको रोकथाम तथा सजायको महासन्धिअन्तर्गतको दायित्वको इजरायलले उल्लंघन गरेको’ उल्लेख रहेको आईसीजेले जनाएको छ ।

दक्षिण अफ्रिकाले संयुक्त राष्ट्रसंघीय अदालतलाई नरसंहार महासन्धिअन्तर्गत प्यालेस्टाइनी जनताको अधिकारलाई गम्भीरताका साथ लिई थप क्षतिबाट जोगाउन प्रभावकारी उपाय अवलम्बन गर्न आग्रह गरेको छ । राससरसिन्ह्वा