काठमाडौं ३ माघ । इरानले मंगलबार पाकिस्तानमा हवाई आक्रमण गरेको छ । आक्रमणमा दुई बालबालिकाको ज्यान गएको छ भने कम्तीमा चारजना घाइते भएका छन् ।

पाकिस्तानले आफ्नो भूमिमा इरानले गरेको आक्रमणको कडा निन्दा गर्दै बदला लिने चेतावनी दिएको छ। इरानले पाकिस्तानको दक्षिणपश्चिम बलुचिस्तान प्रान्तको कोह–ए–सब्ज क्षेत्रमा सुन्नी लडाकु समूहको अड्डा लक्षित आक्रमण गरेको जनाइएको छ ।

जैश अल–अदलका दुई किल्ला ध्वस्त पार्न ‘सटीक मिसाइल र ड्रोन हमला’ गरेको इरानले जनाएको छ ।

सुन्नी लडाकु समूह जैश अल–अदल इरानमा जैश अल–धुल्म भनेर चिनिन्छ ।  इरानले सोमबार उत्तरी इराक र सिरियामा मिसाइल आक्रमण गरेपछि मंगलबार पाकिस्तानमा आक्रमण गरेको हो ।

इजरायलले गाजामा जारी राखेको युद्धले क्षेत्रीय द्वन्द्व बढाउने चिन्ताका बीच पाकिस्तानमा आक्रमण भएको हो ।

पाकिस्तानको विदेश मन्त्रालयले आफ्नो भूमिमा भएको आक्रमणमा ‘दुई निर्दोष बालबालिका’ मारिएको बताउँदै इरानलाई ‘गम्भीर बदला’को चेतावनी दिएको छ ।

‘इरानले पाकिस्तानी हवाई क्षेत्रको अप्रत्याशित उल्लंघन’ गरेको पाकिस्तानले जनाएको छ ।

पाकिस्तान र इरानबीच सञ्चारका धेरै माध्यम हुँदा हुँदै पनि गैरकानुनी कार्य हुनु चिन्ताजनक विषय भएको पाकिस्तानको भनाइ छ ।

इरानको रिभोलुसनरी गार्ड्सले आफ्ना लडाकुका छोराछोरी र पत्नी बस्ने दुई घर ध्वस्त पार्न ६ वटा ड्रोन आक्रमण र थुप्रै रकेट प्रयोग गरेको बताएको छ ।