दाङ, ८ माघ । दाङमा रात्रिबस दुर्घटना हुँदा दुई जनाको ज्यान गएको छ । बर्दियाबाट काठमाण्डु जाँदै गरेको प्रदेश३–०१००५ख९७१९ नम्बरकोबस आइतबार राति ११ बजेतिर लमही नगरपालिका–९ रिहारस्थित जंगलमा दुर्घटना भएको हो ।दाङ प्रहरी प्रवक्ता डिएसपी जनक मल्लले दुर्घटनामा दुई जनाको घटनास्थलमै मृत्यु भएको जानकारी दिए ।

मृत्यु हुनेमा गेरुवा गाउँपालिका– १ बर्दियाका ३६ वर्षीय भिमनाथ योगी र ठेगाना स्पष्ट हुन नसकेका युवराज चौधरी छन् ।बस सडकको भित्तामा ठोक्किएको डिएसपी मल्लले बताए । उनका अुनसार चालक निदाएका कारण घटना भएको हुन सक्ने अनुमान गरिएको छ । बस भित्तामा ठोकिन लागेपछि हामफालेर ज्यान बचाउन खोज्दा योगी र चौधरी च्यापिएका थिए ।दुर्घटनामा अरु यात्रु सकुशल रहेको र चालक घाइते रहेको प्रहरीले जनाएको छ । यसअघि गत २८ पुसमा दाङको राप्ती गाउँपालिका– १ भालुवाङस्थित राप्ती पुलबाट बस खस्दा १२ जनाको मृत्यु भएको थियो ।