काठमाडौं, ४ फागुन । दाईजो लिनु र दिनु दुवै गैरकानुनी मानिन्छ । दाईजोको निहुँमा महिलाहरु पुरुषबाट शोषणमा परेकोे समाचारहरु पटक पटक सुनिदै आएको छ । तर भारतमा भएको एउटा घटनामा भने दाईजोको निहुँमा महिला महिलाकै शोषणमा परेको खुलासा भएको छ । पुरुषको नक्कली रुप धारण गरेर दाईजोको लागि दुई महिलालाई विवाह गरेको आरोपमा भारतीय प्रहरीले एक महिलालाई पक्राउ गरेको छ ।

कृष्णा सेन नाम गरेकी ती महिलालाई प्रहरीले बुधवार भारतको उत्तराखण्ड राज्यबाट दाइजो मागेको आरोपमा पक्राउ गरिएको छ ।

कसरी प्रक्राउ परिन् ?

कृष्ण सेन नाम गरेकी ती महिलाले पुरुषको भेष धारण गरेर दुई महिलासंग विवाह गरेकी थिईन् ।सन् २०१४ मा पहिलो विवाह गरेदेखि २६ वर्षीया सेन पुरुषको भेषमा घुम्ने गरेकी थिईन् । सेन आफ्नी पहिली श्रीमतीसँग विवाहलगत्तै छुट्टिएको र उनले अर्की महिलासँग गत वर्ष अप्रिलमा विवाह गरेको बताइएको छ। तर भूतपूर्व ससुराली पक्षले सेनले दाइजोका लागि आफ्नी छोरीलाई उत्पीडन गरेको आरोप लगाउँदै प्रहरीमा उजुरी गरेको थियो।

उनीहरूले सेनले व्यापार गर्न भनी भारु आठ लाख ५० हजार सापट लिएको तर फिर्ता नगरेको आरोप पनि लगाएका छन्। सोही उजुरीको आधारमा सेनलाई पक्राउ गरिएको हो ।

सोधपुछका क्रममा मात्रै उनी महिला भएको पत्ता लागेको प्रहरीले बताएको छ । पहिला कृष्णाले भनेका कुरा हामीले बुझ्नै सकेनौँ, वरिष्ठ प्रहरी अधिकृत जनमेजय खान्डुरीले भने। प्रहरीले स्वास्थ्य परीक्षण गराएपछि मात्र उनी महिला रहेको पत्ता लाग्यो।

सेनका क्रियाकलापहरु पुरुषको जस्तै हुने भएकोले उनीमाथि कसैले शंका नगरेको प्रहरीको भनाई छ । ‘उनका साथीहरू प्रायः पुरुष हुने गर्थे र उनी पुरुषकै शौचालय प्रयोग गर्ने गर्थिन् एवम् फरक शैलीमा बोल्ने गर्थिन्। कतै केही शङ्का नहोस् भनेर उनी पुरुष साथीहरूसँगै धूमपान र मदिरापान गर्ने र मोटरसाइकल चलाउने गर्थिन्। पुरुषको जस्तै केश, लुगा र व्यवहारले कृष्णा पुरुष जीवन नै व्यतित गर्ने गर्थिन्। त्यसैले कसैले कृष्णालाई शङ्का गरेनन्’ , एक प्रहरी अधिकृतले भने।

बीबीसी