काठमाडौ ९ चैत । इलामका किसान व्यावसायिक सुपारी खेतीतर्फ आकर्षित हुन थालेका छन् । यहाँका झन्डै ७० घरका किसानले व्यावसायिकरूपमा सुपारी खेती गर्दै आएका छन् ।कम मेहनत र थोरै लगानीमा नै मनग्य आम्दानी हुने भएपछि चुरे क्षेत्रका किसान व्यावसायिक सुपारी खेतीमा आकर्षित हुन थालेका हुन् । उनीहरूले खेतबारी र पाखामा सुपारी रोपेर आयआर्जन गर्न थालेका छन् । सुपारीसँगै अरू बाली पनि लगाउन सकिने भएकाले पनि यसप्रति किसानको आकर्षण बढेको हो ।

प्रायः सबै परिवारले सुपारी खेती गर्न थालेका स्थानीय तीर्थ साउदेनले बताए । यस वर्ष इलाममा छ सय १० मेट्रिक टन सुपारी उत्पादन भएको कृषि ज्ञान केन्द्रका निमित्त प्रमुख रामजुगल यादवले जानकारी दिए। इलाममा दुई सय हेक्टर क्षेत्रमा व्यावसायिक सुपारी खेती हुँदै आएको यादवले बताए। एउटै किसानले पाँच हजार बोटसम्म सुपारी लगाउने गरेका छन् । उनीहरूले एकै बोटबाट ५० किलोसम्म सुपारी उत्पादन गरेर किलोको ५० रुपैयाँमा बेच्ने गरेको बताएका छन् ।इलामको माई नगरपालिकाका बोरुङ, चिसापानी, दानाबारी, महमाई, माङसेबुङ गाउँपालिकाका बाँझो, सिङफेरे, मार्चेबुङ, रोङ गाउँपालिका र चुलाचुली गाउँपालिकाका किसानले सुपारीको व्यावसायिक खेती गर्दै आएका छन् ।