काठमाडौं २९ चैत । इरानको चेतावनीका बीच अमेरिकाका राष्ट्रपति जो बाइडेनले इजरायललाई सबै सम्भव सहयोग गर्ने वाचा गरेका छन्। इरानले इजरायललाई कारबाही गर्ने चेतावनी दिएको छ।

हालै सिरियामा भएको आक्रमणमा धेरै इरानी मारिएका छन्।  अमेरिकी राष्ट्रपति बाइडेनले भने, ‘हामी इजरायलको सुरक्षाका लागि सबै सम्भव सहयोग गर्नेछौं।’

इदको अवसरमा जारी सन्देशमा इरानी नेता आयातोल्लाह अली खामेनीले सिरियाको राजधानी दमास्कसमा इजरायलले गरेको आक्रमण इरानविरुद्धको आक्रमण भएको बताएका थिए।

उनले भने, ‘जब उनीहरूले हाम्रो दूतावास क्षेत्रमा आक्रमण गरे, हाम्रो माटोमा आक्रमण गरेजस्तो भयो।’

उनले इजरायललाई सजाय दिने चेतावनी दिए।

अप्रिल १ मा इरानी दूतावास भवनमा भएको आक्रमणमा वरिष्ठ इरानी सैन्य अधिकारीसहित १३ जनाको मृत्यु भएको थियो।

इजरायलले यस आक्रमणको जिम्मेवारी लिएको छैन, तर यसको पछाडि इजरायलको हात रहेको आशंका गरिएको छ।

यस हमलापछि उक्त क्षेत्रमा उपस्थित इजरायली र अमेरिकी सैनिक उच्च सतर्कतामा छन्।