काठमाडौं ६ असार । नेपाली कांग्रेसका सभापति एवं पूर्वप्रधानमन्त्री शेरबहादुर देउवाले नेपाली राजनीतिक परिवर्तनमा महिलाहरूको ठूलो योगदान रहेको बताएका छन्।

बिहीबार काठमाडौँमा आयोजित लैङ्गिक समानता अभिवृद्धिका लागि नेपाल महिला संघको भावी कार्ययोजना निर्माण विषयक कार्यशाला गोष्ठीलाई सम्बोधन गर्दै उनले यस्तो बताएका हुन्।

आगामी दिनमा नेतृत्व विकासमा पनि महिलाहरूको अग्रणी भूमिका रहेको खण्डमा नेपालको राजनीतिक नेतृत्व अझ अघि बढ्नसक्ने उनको भनाइ छ।

साथै, महिलाहरूलाई अहिले समावेशी, समानुपातिकको रुपमा ठाउँ दिइएको उल्लेख गर्दै महिलाहरूको भुमिका अझ बढी र प्रभावकारी, सशक्त हुने विश्वास व्यक्त गरे।

‘महिलाहरूको धेरै ठूलो योगदान रहेको छ, नेपाली राजनीतिक परिवर्तनमा। भोलिको दिनमा नेतृत्व विकासमा पनि महिलाहरूको अग्रणी भुमिका रहेको खण्डमा सबै ठाउँमा महिलाहरूलाई अहिले समावेशी, समानुपातिकको रुपमा महिलाहरूलाई ठाउँ दिइएको छ। त्यसले गर्दा महिलाहरूको भुमिका अझ बढी र प्रभावकारी, सशक्त हुने कुरामा मलाई विश्वास छ,’ सभापति देउवाले भने, ‘महिलाहरूलाई हाम्रो पार्टीमा अन्तरघातको रोग छ। यसबाट मुक्त गराउनसके महिलाहरूलाई अझ बढी मौका मिल्ने विश्वास लिएको छु। अहिले संसारभर नै महिलाहरूको अधिकारका लागि महिलाहरूको समावेशीकरणका लागि, समानुपातिक विकासका लागि संसारभर नै एउटा आवाज उठेको छ।’

उनले अहिले संसारभर नै महिलाहरूको अधिकार, समावेशीकरण, समानुपातिक विकासका लागि आवाज उठिरहेको र नेपालमा महिला राष्ट्रपति विद्यादेवी भण्डारी भइसकेको उल्लेख गर्दै उनीजस्तै योग्य बन्न आग्रह गरे।

‘नेपालमा पनि महिला राष्ट्रपति समेत नेपालमा हुनुभएको छ। विद्या भण्डारीजी दुई पटक हुनुभएको छ। भोलिका दिनमा पनि यस्तै ठाउँहरू महिलाहरूले पाउनु हुनेछ। महिलाहरूले त्यस किसिमको योग्य र सक्षम र सबै किसिमको तयारीका साथ अघि बढ्नुपर्छ,’ उनले भने।

नेपाली कांग्रेसभित्र महिलाहरूमा अन्तरघातको रोग रहेको जिकिर गर्दै यसबाट मुक्त गरेको खण्डमा महिलाहरूलाई अझ बढी मौका मिल्ने उनको विश्वास थियो।

‘महिलाहरूको कुरा उठेको छ। केही महिलाहरूलाई सिटको व्यवस्था गर्नुपर्छ, चुनावमा नत्र समस्या पर्छ भन्नेकुरा छ। त्यो गरेर जान सकिने कुरा हो तर हाम्रो त महिला हारिहाल्छ समस्या पर्छ के। अरु पार्टीका महिला जित्ने हाम्रोका हार्ने। त्यो कसरी हार्न नदिने र पार्टीलाई महिला कसरी जिताउने भन्ने किसिमको तयारी गर्नुपर्छ। महिला सशक्तिकरणको अभियान तपाईंहरू अघि बढाउनुस्।’