काठमाडौं, २ भदौ । नेकपा एमालेका वरिष्ठ उपाध्यक्ष ईश्वर पोखरेलले संविधान संशोधनका बारेमा पार्टीमा कुनै छलफल नभएको बताएका छन् । एबीसी टेलिभिजनका प्रधानसम्पादक शुभशंकर कँडेलसँग आउटलुक कार्यक्रममा बोल्दै पोखरेलले संविधानको संसोधन बारे पार्टी भित्र व्यवस्थित रुपमा छलफल नभएको बताएका हुन् । संविधान शंसोधन बारे पार्टीका महासचिव शंकर पोखरेलले दिएको थ्रेस होल्ड १० प्रतिशत र दुई दलीय प्रणाली बारेको अभिव्यक्ति निजी धारणा रहेको पोखरेलले स्पष्ट गरे । संशोधन गर्ने भनिसकेपछि जो कसैले पनि आफ्नो धारण राख्न सक्ने तर सर्वपक्षीय र सर्वदलीय सहमति मा संविधान संशोधन हुने उनको धारणा छ ।

वरिष्ठ उपाध्यक्ष पोखरेलले मुलुकलाई विकास, समृद्धि र स्थिरताको बाटोमा अगाडि बढाउन काँग्रेस र एमाले मिलेर सरकार बनेको दावी गरे । अहिलेको सरकारले केही न केही सकारात्मक कार्य गर्ने उनले आशा गरेका छन् । उनले राष्ट्रिय मुद्दामा, राष्ट्रलाई संकट परेको बेला ऐतिहासिक परिवर्तनका क्षणमा कांग्रेस र कम्युनिष्टको सहकार्य हुने गरेको भन्दै कांग्रेस र एमालेको सम्बन्ध बहुआयामिक रहेको बताए ।
जनभावना के कुरासँग गाँसिएको छ भन्ने कुरामा पनि सरकारले ध्यान दिनुपर्ने र समाजमा के मुद्दाले असर गरिरहेको छ भन्ने बारेमा गम्भीर बन्न उपाध्यक्ष पोखरेलले सरकारलाई सुझाव दिएका छन् । यो अन्तर्वार्ता शानिबार राती ९ बजे र आइतबार विहान ८ प्रसारण भएको थियो । यो अन्तर्वार्ता एबीसी टिभी नेपाल युट्युव च्यानलमा पनि हेर्न सकिनेछ ।