काठमाडौं, ५ असोज । पूर्वप्रधानमन्त्री एवं (नेकपा एकीकृत समाजवादी) का सम्मानित नेता झलनाथ खनालले संविधान भित्रका समाजवादी पक्षहरुलाई तलमाथि हुनेगरी संशोधन गरे राष्ट्रव्यापी आन्दोलन गर्ने चेतावनी दिनुभएको छ ।
संविधान संशोधन गर्ने नाममा समाजवादी पक्षहरूलाई तलमाथि गर्नेकुरा सह्य नहुने बताउनुभयो । एबीसी टेलिभिजनका प्रधानसम्पादक शुभशंकर कँडेलसँग आउटलुक कार्यक्रममा बोल्दै उहाले संविधान एउटा सम्झौता भएकाले संविधानको रक्षाका लागि आन्दोलन गर्ने घोषणा समेत गर्नुभयो । उहाँले संविधानमा भएका प्रगतिवादी कुराहरुमध्ये कुनैपनि कुराहरुलाई पश्चगामी ढंगले संशोधन गर्न प्रयत्न गरे देशमा अर्को जनआन्दोलन निम्तिने दावी गर्नुभयो । दुई ठुला पार्टीले निर्वाचन प्रणाली बदले बहुमत ल्याउने र सरकार संचालन गर्ने भन्नु दिवा सपना भएको समेत बताउनुभयो ।

२०६२/६३ को उपलब्धीलाई हटाउने प्रयास गरे जनस्तरबाट उठने आँधीबेरीले दुई ठुला पार्टीलाई बढारिने बताउनुभयो । ६२÷६३ को म्यान्डेट भन्दा बाहिर गए आन्दोलन हुन सक्ने खतरा तर्फ पनि उहाँले सचेत गराउनुभयो । उहाँले संविधान संसोधन गर्ने भए जनमत संग्रहमा जान सक्नु पर्ने समेत तर्क गर्नुभयो, गणतन्त्रको उपलब्धीलाई समानुपतीक हटाउने कुरा संह्य नहुने समेत चेतावनी दिनुभयो ।

उहाँले देशमा यतिबेला राजनीतिक, आर्थिक, सामाजिक, सांस्कृतिक संकट गहिरिँदै गएको बताउदै नागरिकमा ब्यापक निरासा छाएको समेत बताउनुभयो त्यसैलाई क्यास गर्न नेताहरुलाइ गाली गर्ने र जनतामा भएको निराशालाई नेता तिर लगाउने भइरहेको बताउनुभयो । उहाँले कार्यक्रममा काँग्रेस एमालेको मिलेर बनेको सरकार धेरै अगाडी नजाने समेत तर्क गनुृभयो । नेता खनालको अन्तर्वार्ता शनिवार ९ बजे र आइतबार विहान ७ बजे पुन प्रसारण हुनेछ । यो अन्तर्वार्ता एबीसी टिभी नेपाल युट्युव च्यानलमा पनि हेर्न सकिनेछ ।