काठमाडौं २६ मंसिर । इरानका सर्वोच्च नेता आयातोल्लाह अली खामेनीले सिरियामा बसर अल असदको शासन ढल्नुमा अमेरिका र इजरायलको हात रहेको बताएका छन्।

खामेनीले टर्कीको नाम नलिई उसलाई पनि दोष दिएका छन्।

‘सिरियामा जे भयो, त्यो अमेरिकी र यहुदीवादी योजनाको नतिजा थियो। यसमा कुनै सन्देह छैन,’ खामेनीको भनाइ इरानको तस्निम समाचार एजेन्सीले उधृत गरेको छ।

‘हो, सिरियाको एउटा छिमेकी सरकारले पनि यसमा भूमिका खेल्यो, खेल्दैछ। सबैले देखेका छन्। तर, मुख्य षड्यन्त्रकारी, मास्टरमाइन्ड र कमान्ड सेन्टर अमेरिका र यहुदीवादी सत्तामा छ,’ उनले भनेका छन्।

यसको प्रमाण पनि आफूहरूसँग रहेको उनको दाबी छ।

केही दिनयता इजरायलले सिरियामा लगातार बमबारी गरिरहेको छ। जसका कारण सामान्य हुँदै गएको जनजीवनमा त्रास बढेको बताइएको छ।

सिरियाली सहरहरूमा बुधबार पसलहरू खुलेका छन् भने मानिसहरू काममा फर्किन थालेका छन्। एजेन्सी