काठमाडौं २४ पुस । नेपाली कांग्रेसबाट सरकारको नेतृत्व गरेका उपप्रधानमन्त्री एवं शहरी विकास मन्त्री प्रकाशमान सिंहलाई अहिले भ्याइनभ्याइ छ । उनको भ्याईनभ्याई मन्त्रालयको कार्ययोजना कार्यान्वयनका लागि राजनीतिक कार्यक्रमदेखि मेलारमहोत्सव उद्घाटन र समापनमा भइरहेको छ । तर मन्त्रालयको प्रगति भने सुस्त छ ।

चालु आर्थिक वर्ष २०८१र८२ का लागि विकासे मन्त्रालयतर्फ दोस्रो ठूलो बजेट पाएको सहरी विकास मन्त्रालयको बजेट कार्यान्वयन भने कमजोर छ । भौतिक पूर्वाधारपछि ठूलो बजेट ९१ अर्ब ३५ करोड २३ लाख रहेको मन्त्रालयले कार्यान्वयन कमजोर गरेको हो ।

मन्त्रालयका अनुसार १९ पुससम्म कुल बजेटबाट ६ अर्ब ३५ करोड ६२ लाख ८२ हजार रुपैयाँ मात्रै खर्च भएको छ ।

बजेटमा आएका २ हजार बढी कार्यक्रमको छैन सुरसार

मन्त्रालयले बजेट मार्फत चालु आर्थिक वर्षका लागि तीन हजार ७१६ नयाँ कार्यक्रममध्ये जम्मा एक हजार ६२३ को मात्रै बोलपत्र आह्वान भएका छन् । बोलपत्र आह्वान भएका एक हजार ६२३ कार्यक्रममध्ये ८ सय ७० को ठेक्का सम्झौता भईबि ३० कार्यक्रम निर्माण कार्य सम्पन्न भएको छ ।

तर, बजेटमार्फत आएका बाँकी दुई हजार ९३ कार्यक्रमको अहिलेसम्म बोलपत्र आह्वान हुन सकेको छैन ।

बोलपत्र आह्वान नभएका दुई सय ८८ कार्यक्रम बहुवर्षीय स्वीकृतिका लागि प्रस्तावित छन् भने ८० वटा संशोधनका लागि प्रस्तावित कार्यक्रम रहेको मन्त्रालयले जनाएको छ ।

मन्त्रालयले एक हजार ४ सय ५९ पुराना कार्यक्रममध्ये चालु आवमा जम्मा दुई सय ८० कार्यक्रम सकेको छ ।

१०१ झोलुङ्गे, ३ सडक पुल निर्माण

सिंहले मन्त्रालय सम्हालेको ६ महिनाभित्र १० किलोमिटर ग्रामीण कालोपत्र सडक निर्माण हुने लक्ष्य मन्त्रालयको थियो । तर, ६ महिना पुग्न लाग्दा हालसम्म झापा, रोल्पा र पर्वत गरी तीन जिल्लामा गरी ६।९ किलोमिटर निर्माण भएको छ ।

यस्तै, तीन स्थानीय सडक पुल निर्माण गर्ने लक्ष्य रहेकोमा सबै निर्माण भएका छन् । मन्त्री सिंहले कार्यभार सम्हालेको पहिलो एक सय दिनमा ५० र दोस्रो सय दिनमा ३० गरी कुल ८० झोलुंगे पुल निर्माण गर्ने लक्ष्य रहेकोमा हालसम्म मन्त्रालयले एक सय एक झोलुंगे पुल निर्माण गरिसकेको छ ।

मन्त्रालयले चालु आव १९ पुससम्म निर्माणाधीन अवस्थामा रहेका ३० स्थानीय तहका प्रशासकीय भवन निर्माण सम्पन्न गरेको छ ।

सिटीहल निर्माण हुने क्रममा

आगामी १७ माघसम्ममा सिटीहलहरूको निर्माण कार्य सम्पन्न हुने दाबी गरिएको छ । दुई सय दिनभित्र सुनसरी लौकही सभाहल र बाँके नेपालगञ्ज सिटीहल निर्माण सक्ने लक्ष्य छ । तिनमा लौकही सभाहल निर्माण कार्य अन्तिम चरणमा रहेको र नेपालगन्ज सिटीहल ठेक्काअनुसार निर्माण कार्य सम्पन्न भई बिल फरफारक अन्तिम चरणमा रहेको दाबी गरिएको छ ।

यस्तै, भैंसेपाटीस्थित मन्त्रीनिवासको दोस्रो चरणको निर्माण कार्य र चण्डीदल गणका लागि भवन निर्माण कार्य सम्पन्न गर्ने लक्ष्य रहेकोमा १९ पुससम्म भैंसेपाटी निवासको दोस्रो चरणको निर्माण कार्य ८० प्रतिशत सम्पन्न भइसकेको छ । यस्तै, चण्डीदल गणका लागि भवन निर्माण कार्य सम्पन्न भई हस्तान्तरण प्रक्रियामा रहेको छ ।

शहरी नीति स्वीकृत, कीर्तिपुरमा फ्लडलाइटको ठेक्का आह्वान

मन्त्रालयले चालु आव पाँच महिना नाघ्दा आफ्नो उपलब्धिमा मन्त्रिपरिषद्बाट राष्ट्रिय सहरी नीति स्वीकृतिदेखि कीर्तिपुर मैदानमा फ्लडलाइटको ठेक्कासम्म देखाएको छ । ८ मंसिरमा सहरी नीति मन्त्रिपरिषद्बाट स्वीकृत भएको थियो ।

मन्त्रालयले त्रिवेणी सुस्ता बहुत्तरी झोलुंगेपुल उद्घाटन, दमक व्यापारिक कम्प्लेक्स उद्घाटनलाई पनि उपलब्धि देखाएको छ । कीर्तिपुर क्रिकेट मैदानमा अन्तर्राष्ट्रिय मापदण्ड अनुरूप फ्लडलाइट जडान गर्ने भन्दै बोलपत्र आह्वान हुनु पनि मन्त्रालयले आफ्नो उपलब्धि मानेको छ ।