काठमाडौं, ८ फागुन । अमेरिकी राष्ट्रपति डोनाल्ड ट्रम्पले युक्रेनका राष्ट्रपति भ्लोदोमिर जेलेन्स्की ‘तानाशाही’ भएको आरोप लगाएका छन् ।
जेलेन्स्कीले युक्रेनको बारेमा रुसले गलत सूचना फैलाइरहेको र त्यसबाट ट्रम्प पनि भ्रममा परेको टिप्पणी गरेपछि ट्रम्पले जेलेन्स्कीबारे कडा टिप्पणी गरेका हुन् ।
उनले सोसल मिडिया ट्रुथ सोसलमा जेलेन्स्कीलाई चुनावविना राष्ट्रपति बनेको तानाशाहको संज्ञा दिएका हुन् ।
जेलेन्सीको राष्ट्रपतिको कार्यकाल सन् २०२४ को मे महिनामा समाप्त हुने थियो । तर सन् २०२२ को फेब्रुअरीदेखि रुससँग युद्ध सुरु भएपछि त्यहाँ चुनाव हुन सकेको छैन ।
ट्रम्पले यसअघि जेलेन्स्कीको लोकप्रियता जम्मा चार प्रतिशत रहेको समेत बताएका थिए । तर बीबीसीको फ्याक्टचेकमा अझै पनि ५७ प्रतिशत युक्रेनी जनता जेलेन्स्कीको पक्षमा रहेको पाइएको थियो ।
ट्रम्पले जेलेन्स्की केन्द्रित लामो स्टाटस ट्रुथ सोसलमा पोष्ट गरेका छन् । उनले जेलेन्स्कीलाई ‘कमेडियन’ भनेर पनि आलोचना गरेका छन् ।
ट्रम्पले भनेका छन्, ‘मैले युक्रेनलाई माया गर्छु तर जेलेन्स्कीले धेरै नराम्रो गरेका छन् । उनको देश खत्तम भइसकेको छ । लाखौं व्यक्ति अनाहकमा मारिइरहेका छन् ।’
अघिल्ला राष्ट्रपति जो बाइडेन नेतृत्वको अमेरिकी सरकारले युक्रेनलाई साढे तीन सय अर्ब डलर दिएको तर अमेरिकाले केही पनि नपाएको टिप्पणी ट्रम्पले गरेका छन् । ‘एकपटक सोच्नुस् त । एक औसत रुपमा सफल कमेडियन भ्लोदोमिर जेलेन्स्कीले अमेरिकाबाट साढे तीन सय अर्ब डलर मागे । ताकि उनी युद्धमा हाम फाल्न सकुन् तर जित्न सक्दैनथे ।’
‘यस्तो युद्ध सुरु हुनुहुँदैनथ्यो । यस्तो युद्ध जो अमेरिकाले ट्रम्पबिना अन्त्य गर्नै सक्दैनथ्यो । अमेरिकाले यो लडाइँमा युरोपभन्दा २०० अर्ब डलर भन्दा बढी खर्च गरेको छ । युरोपलाई त्यो खर्चवाफतको रकम फिर्ता मिल्ने छ । तर अमेरिकाले केही पनि पाउने छैन ।’
ट्रम्पले अमेरिकाले दिएको रकममध्ये आधा रकम जेलेन्स्कीले गायब पारेको आरोप पनि लगाएका छन् । यो प्रसंगमा ट्रम्पले अघिल्ला राष्ट्रपति जो बाइडनको पनि आलोचना गरेका छन् ।
उनले भनेका छन्, ‘स्लिपी जो बाइडेनले यो मामलामा बराबरीको माग किन गरेनन् रु जबकी यो लडाइँ हामीलाई भन्दा धेरै महत्वपूर्ण युरोपलाई छ । यसमा चाखलाग्दो कुरा त के छ भने हामीले दिएको मध्ये आधा रकम गायब भएको जेलेन्स्कीले स्वीकार गरेका छन् । उनले देशमा चुनाव गराउन पनि अस्वीकार गरेका छन् ।’
ट्रम्पले भनेका छन्, ‘युक्रेनमा जेलेन्स्कीको लोकप्रियता साह्रै घटिसकेको छ । केबल एक कुरामा उनी माहिर छन्, त्यो हो– उनले बाइडेनलाई आफ्नो इशारामा नचाए ।’
ट्रम्पले भनेका छन्, ‘मैले युक्रेनलाई माया गर्छु तर जेलेन्स्कीले धेरै नराम्रो गरेका छन् । उनको देश खत्तम भइसकेको छ । लाखौं व्यक्ति अनाहकमा मारिइरहेका छन् ।’
ट्रम्पले रुस–युक्रेन युद्ध अन्त्य गर्ने कोसिस गरिरहेको पनि बताएका छन् । यस्तो गर्न आफूले मात्र सक्ने उनले दाबी गरेका छन् ।