काठमाडौं । इन्डोनेसियाको पश्चिम नुसा तेङ्गारा प्रान्तअन्तर्गत लोम्बोक टापु नजिकै समुद्रमा बुधबार ‘पुत्री यास्मिन’ नामक डुंगामा आगलागी हुँदा ११२ जनाको उद्धार गरिएको स्थानीय अधिकारीहरूले बताएका छन्।

स्थानीय अधिकारीलाई उद्धृत गर्दै जापानी सञ्चारमाध्यमले जनाएअनुसार नजिकै रहेको अर्को डुंगाले ३६ जनालाई उद्धार गरी बाली फर्काएको थियो। त्यस्तै, खोज तथा उद्धार एजेन्सीको जहाजले ५९ जनाको उद्धार गरेको थियो।

नौसेनाको जहाजले थप १७ जनालाई समुद्रबाट उद्धार गरेको अधिकारीहरूले बताएका छन्।

स्थानीय सञ्चारमाध्यमका अनुसार डुंगामा ११४ जना यात्रु र १७ जना चालक दलका सदस्य गरी कुल १३१ जना सवार थिए। हालसम्म यात्रु तथा चालक दलका सदस्यको मृत्यु वा घाइते भएको सम्बन्धमा कुनै विवरण पुष्टि भएको छैन।

बालीबाट लोम्बोकतर्फ जाँदै गरेको डुंगामा अचानक आगलागी भएको बताइएको छ। आगलागीको कारण भने अहिलेसम्म खुल्न सकेको छैन। घटनाबारे थप अनुसन्धान तथा खोजी–उद्धार कार्य जारी रहेको जनाइएको छ।

Originally published on abcnews.com.np.