काठमाडौं १४ चैत । अमेरिकी राष्ट्रपति डोनाल्ड ट्रम्पले अमेरिका आयात गर्ने सवैखाले गाडीमा थप २५ प्रतिशत कर लगाउने आदेश जारी गरेका छन् । वाइट हाउस प्रेस सेक्रेटरी क्यारोलिन लेभिटले वाइट हाउसमा पत्रकारहरूसँग ब्रीफिङ गर्दै राष्ट्रपति ट्रम्पले मोटरगाडीमा शुल्क लागू गर्ने घोषणा गरेको बताइन् ।

थप शुल्कहरूले मोटरगाडी कम्पनीहरूलाई अमेरिकामा थप फ्याक्ट्रीहरू स्थापना गर्न प्रोत्साहित गर्ने ट्रम्पको प्रमुख लक्ष्य हो। तर यदि यी शुल्कहरू धेरै व्यापक रूपमा लागू गरियो भने, यसले कार निर्माताहरूको आपूर्ति श्रृंखला बिगार्न सक्ने र उनीहरूको लगानीलाई घटाउनुका साथै उपभोक्ताहरूको लागत महत्त्वपूर्ण रूपमा बढाउन बढाउने आशंका रहेको न्यूयोर्क टाइम्सले उल्लेख गरेको छ ।

टाइम्सका अनुसार नयाँ शुलक लगाएपछि विशेष गरी युरोपेली देशहरू, जापान र दक्षिण कोरियासँग व्यापारिक तनाव बढाउन सक्नेछ । ती देशहरूले अमेरिकामा धेरै कारहरू निर्यात गर्छन्।

वाल स्ट्रीट रिसर्च फर्म बर्नस्टाइनको तथ्यांक अनुसार, अमेरिकामा बिक्री हुने लगभग आधा कारहरू आयातित छन्, र अमेरिकामा असेम्बल गरिएका कारहरूका ६० प्रतिशत पुर्जाहरू पनि आयातित छन्।
मोटरगाडीमा शुल्क लागू हुने खबरले स्टक बजारमा गिरावट आएको छ । अमेरिकी कार निर्माताहरूको शेयर मूल्य घटेको छ । बुधबारदिउँसोको सुरुमा एस एन्ड पी ५०० मा १ प्रतिशतभन्दा बढी गिरावट रहेको थियो। अधिकांश कार कम्पनीहरूको शेयर २ प्रतिशत सम्म तल झरेको थियो ।

यी कार शुल्कहरू ट्रम्पले हालैका महिनाहरूमा लागू गरेका अन्य व्यापक शुल्कहरूमा थप हुनेछन्। कार्यभार सम्हालेपछि, ट्रम्पले चीनबाट आयात हुने सबै वस्तुमा २० प्रतिशत थप शुल्क लगाएका छन्। उनले क्यानाडा र मेक्सिकोबाट आयात हुने लगभग सबै वस्तुमा २५ प्रतिशत शुल्क लगाए, तर उत्तर अमेरिकी व्यापार सम्झौता (युएसएमसीए) अन्तर्गत व्यापार हुने आधा वस्तुलाई यसमा छुट दिएको घोषणा गरेका थिए । ट्रम्पले अप्रिल २ मा थप शुल्क लागू गर्ने योजना बनाएका छन्, जहाँ उनले अन्य देशहरूले अमेरिकी निर्यातमा लगाउने उच्च शुल्क र व्यापारिक बाधाहरूसँग मिल्दो ‘पारस्परिक शुल्क’घोषणा गर्ने बताएका छन्।

अमेरिकी कार निर्माताहरू र कार खरिदकर्ताहरूले यी नयाँ शुल्कहरूको प्रत्यक्ष महसुस गर्नेछन् । कार उद्योगमा आपूर्ति श्रृंखला जटिल भएकाले, कुन कार अमेरिकी निर्मित हो र कुन आयातित हो भन्ने कुरा निकै गाह्रो हुँदै गएको छ।