काठमाडौं २२ चैत । संयुक्त राष्ट्रसंघको आव्हानमा शान्ति स्थापना कार्यको लागि सिरियामा तैनाथ टोली फेरबदल भएको छ। फोर्स हेडक्वार्टरको सपोर्ट युनिटका १३ औँ डफ्फा, इन्जिनियर तर्फको नवौँ डफ्फा, दुर्गाभञ्जन गुल्म आठौँ डफ्फा र लेबल एक माथिको अस्पताल छैठौँ डफ्फाका २०२ जना नेपाली शान्ति सैनिकहरूको पहिलो टोली मिसन इलाकातर्फ प्रस्थान गरेका हुन्।

प्रमुख सेनानी रविजंग खड्काको नेतृत्वमा चैत्र २१ गते मिसन इलाकातर्फ प्रस्थान गरेको सैनिक जनसम्पर्क तथा सूचना निर्देशनालयले जानकारी दिएको छ।

यसअघि सोही मिसनमा आफ्नो कार्यकाल सम्पन्न गरी १९७ जना शान्ति सैनिकहरू प्रमुख सेनानी दिनेशकुमार खड्काको नेतृत्वमा चैत्र २१ गते नै स्वदेश फिर्ता भएका थिए।

सिरियाको उक्त मिसनमा नेपाली सेनाबाट सैनिक पर्यवेक्षक, स्टाफ अधिकृत र विभिन्न युनिटहरूका गरी ४४८ जना शान्ति सैनिकहरू कार्यरत छन्।