काठमाडौं २४ चैत । पूर्वप्रधानमन्त्री एवं प्रमुख प्रतिपक्ष नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफ्ना माग पुरा नभएसम्म सरकारलाई नछोड्न आन्दोलित शिक्षकहरुलाई आग्रह गरेका छन्।

‘जबसम्म तपाईंहरुको माग पुरा हुँदैन, तपाईंहरू सरकार नछोड्नुहोस्,’ आइतबार काठमाडौँमा आयोजित नेवा मुक्ति मोर्चाको कार्यक्रममा उनले भने, ‘कहिले सिठी बजाउनुहोस्। के गर्नुपर्छ गर्नुहोस्, हामी तपाईंहरुको साथमा छौं।’

विद्यालय शिक्षा ऐन आफूहरुको माग अनुसार पारित गर्नुपर्ने माग गर्दै शिक्षकहरु केही दिनयता काठमाडौँमा आन्दोलित छन्। प्रचण्डले सरकारकै कमजोरीका कारण उनीहरु सडकमा आएको आरोप समेत लगाए।

‘अहिले हतार–हतार संसद अधिवेशन अन्त्य गर्नुपर्ने नै थिएन, त्यही शिक्षकको विधेयकमा छलफल गरेर किन नटुंग्याएकोरु,’ उनको प्रश्न छ, ‘त्यसलाई पारित गरेर शिक्षकका माग पुरा गर्न सकिन्थ्यो। तर, हतार–हतार संसद अधिवेशन अन्त्य गर्‍यो र शिक्षकहरुलाई आन्दोलनमा आउन बाध्य पार्‍यो।’

आवश्यक परे प्रतिपक्षी दलहरुले शिक्षकका माग पुरा गर्न विशेष अधिवेशन बोलाउन समेत माग गर्न सक्ने प्रचण्डको भनाइ छ। ‘प्रतिपक्षहरुको बैठक बसेर शिक्षकहरुका निम्ति जरुरी पर्‍यो भने विशेष अधिवेशन बोलाएर भए पनि शिक्षकका माग पुरा गर्न हामी अघि बढ्छौं,’ उनले भने।

आफू सरकारमा हुँदा शिक्षहरुसँग ५ बुँदे सहमति गरेको भन्दै उनले त्यही अनुसार ऐन बनाएर पारित गर्नुपर्नेमा उनको जोड छ।

‘ऐन निर्माण गरेर शिक्षक, कर्मचारीका समस्या हल गरिन्छ भनेर ५ बुँदे सहमति त्यतिबेला हाम्रो नेतृत्वको सरकारले गरेको थियो,’ प्रचण्डको भनाइ छ, ‘त्यही अनुसार धेरै मेहनत गरेर विद्यालय शिक्षा विधेयक सदनमा हामीले नै पुर्‍याएका हौं।’