काठमाडौं २२ जेठ, । नेकपा एकीकृत समाजवादीले अध्यक्ष माधव कुमार नेपालविरुद्ध गलत, भ्रमपूर्ण र योजनाबद्ध तरिकाबाट षड्यन्त्र भएको निष्कर्ष निकालेको छ ।

अध्यक्ष नेपालविरुद्ध अख्तियार दुरुपयोग अनुसन्धान आयोगले मुद्दा दायर गरेको थियो ।

त्यस लगत्तै अध्यक्ष नेपालसहित अपरान्ह बसेको पार्टी बैठकले यस्तो निष्कर्ष निकालेको उपाध्यक्ष प्रकाश ज्वालाले जानकारी दिए ।

‘हामी शीर ठाडो पारेर यस्ता प्रक्रियाको विरोधमा जान्छौं । हामी अदालतबाट क्लिनचिट लिएर गलत, योजनाबद्ध, षड्यन्त्र खारेज गर्ने सन्देश दिनेगरी फर्कन्छौं,’ उपाध्यक्ष ज्वालाले भने ।

साथै, पार्टी पंक्तिलाई कुनै पनि भ्रम नपर्न आग्रह गरे ।

‘हाम्रा नेताहरूका विरुद्धमा पहिलेदेखि नै प्रहार हुँदै आएको थियो । त्यस्ता षड्यन्त्र परास्त गर्दै आयौं,’ बैठकपछि ज्वालाले भने, ‘आज फेरि अध्यक्षविरुद्ध मुद्दा दायर गरेर अर्को एउटा षड्यन्त्र, राजनीतिक प्रतिशोधसहित गरिएको छ । हामी यो कुराको प्रतिवाद र भण्डाफोर गर्छौं ।’

आफूहरू मुद्दाबाट पछि नहट्ने बताउँदै अध्यक्षले अहिलेसम्म कुनै सार्वजनिक सम्पत्तिको दुरुपयोग नगरेको उनले बताए ।

‘सार्वजनिक सम्पत्ति दुरुपयोग गर्ने र आर्थिक चलखेल गर्ने कुनै काम गर्नुभएको छैन,’ ज्वालाले भने ।
बैठक अघि माधव नेपाल सहितका नेताहरुले पार्टी कार्यालयमा नै बोलाएर बरिष्ठ अधिवक्ता द्धय शम्भु थापा र गोविन्द बन्दीसँग मुद्धाका बारेमा परामर्श गरेका थिए ।
थापा र बन्दीले मुद्धा अदालत गइसकेको हुनाले अदालतमै प्रतिवाद गर्न सल्लाहा दिएका छन् ।