काठमाठौ २७ असार । अविरल वर्षाका कारण आज बिहानदेखि अवरुद्ध बनेको कालीगण्डकी करिडोर सडक एकतर्फी रूपमा सञ्चालनमा आएको छ । कालीगण्डकी करिडोर सडक अन्तर्गत गुल्मीको कालीगण्डकी गाउँपालिका–६ खड्गकोटको बरल्वामा पहिरो खसेपछि बिहान ६ बजेदेखि सडक पूर्णरूपमा अवरुद्ध बनेको थियो ।

सडक माथिबाट ठूला ठूला चट्टानहरूसहित खसेको पहिरोको छेउतिरको केही भाग पन्छाएपछि एकतर्फी रूपमा सडक सञ्चालनमा आएको जिल्ला प्रहरी कार्यालय गुल्मीका प्रहरी नायब उपरीक्षक गंगाबहादुर सारुले बताउनुभयो ।

अवरुद्ध सडक सञ्चालनमा ल्याउनका लागि प्रहरी चौकी भुर्तुङ्बाट बिहानैदेखि प्रहरी टोली पहिरो गएको ठाउँमा परिचालन गरिएको थियो । दुवैतर्फ सडक सञ्चालनका लागि यो टोलीले सडक निर्माण कम्पनी कालीका कन्ट्रक्शननको सहयोगमा सडकमा थुप्रिएको बाँकी पहिरो पन्छाउने काम गरिरहेको छ ।

एकतर्फी रूपमा सडक सञ्चालनमा आएपछि कालीगण्डकी करिडोर सडक अन्तर्गत गुल्मी र बाग्लुङ क्षेत्रमा रोकिएका लामो तथा छोटो दूरीका गाडीहरू गन्तव्यतिर लागेका छन् ।