काठमाडौ १३ भदौ । भारत र क्यानडाले दुवै देशमा आफ्ना उच्चायुक्त नियुक्त गरेका छन् । सन् २०२३ मा भ्यानकुभरको उपनगरमा एक सिख पृथकतावादी नेताको हत्यापछि तनावग्रस्त सम्बन्ध पुनर्स्थापित गर्ने पछिल्लो कदममा भारत र क्यानडाले एकअर्काका देशमा नयाँ उच्चायुक्तहरू नियुक्त गरेका बीबीसीले जनाएको छ ।

भारत सरकारले वरिष्ठ कूटनीतिज्ञ दिनेश के। पटनायकलाई क्यानडाका लागि भारतको नयाँ उच्चायुक्तका रूपमा नियुक्त गरेको छ । यस्तै क्यानडाले क्रिस्टोफर कुटरलाई भारतका लागि आफ्नो नयाँ उच्चायुक्तका रूपमा नियुक्त गरेको छ । यो पद गएको वर्षदेखि खाली थियो ।

नयाँ उच्चायुक्तको नियुक्तिले भारतसँगको कूटनीतिक संलग्नतालाई बिस्तारै गहिरो बनाउने र द्विपक्षीय सहयोगलाई अगाडि बढाउने क्यानडाको नीतिलाई प्रतिबिम्बित गर्ने क्यानडाकी विदेशमन्त्री अनिता आनन्दले एक विज्ञप्तिमा उल्लेख गर्नुभएको छ ।

भारतका अघिल्ला उच्चायुक्तले गएको अक्टोबरमा क्यानडा छोडेका थिए । क्यानडाले पृथकतावादी हरदीप सिंह निज्जरको हत्यामा संलग्न भएका कारण निष्कासित गरिएका ६ जना कूटनीतिज्ञमध्ये उनी पनि रहेको बताएको छ । तर भारतले भने उच्चायुक्तलाई फिर्ता बोलाएको बताएको छ ।

भारतले त्यही दिन तत्कालीन कार्यवाहक उच्चायुक्तसहित ६ जना वरिष्ठ क्यानेडियाली कूटनीतिज्ञलाई निष्कासन गर्ने आदेश दिएको पनि बताएको थियो ।

पूर्वप्रधानमन्त्री जस्टिन ट्रुडोले क्यानडामा सिख पृथकतावादी नेता हरदीप सिंह निज्जरको हत्यामा भारतको संलग्नता रहेको आरोप लगाएपछि भारत र क्यानडाबीचको सम्बन्ध बिग्रिएको थियो । भारतले यो आरोपलाई निरन्तर अस्वीकार गर्दै आएको छ ।