थाइल्यान्डको संवैधानिक अदालतले प्रधानमन्त्री पेतोङतार्न सिनावात्रालाई पदबाट हटाएको छ। २००८ यता यो अदालतले बर्खास्त गरेको उनी पाँचौँ प्रधानमन्त्री हुन्।

राजाको इसारामा चल्ने सेना र अदालतको हस्तक्षेपबाट आक्रान्त थाइल्यान्डमा फेरि अनिश्चितताको अवधि सुरु हुने त्रास पैदा भएको छ।

कम्बोडियाका प्रधानमन्त्री हुन सेनसँग टेलिफोन संवाद सार्वजनिक भएपछि सिनावात्रा विवादमा परेकी थिइन्। सो संवादमा उनले हुन सेनलाई ‘अंकल’ भनेर सम्बोधन गर्नुका साथै थाइ सेनाको आलोचना पनि गरेकी थिइन्।

त्यसपछि ३६ सिनेटरहरुले उनले नैतिक आचरण उल्लंघन गरेको भन्दै संवैधानिक अदालतमा उजुरी गरेका थिए।

अदालतले उनले प्रधानमन्त्रीका रुपमा नैतिक आचरण उल्लंघन गरेको ठहर गरेको छ। अदालतका ९ न्यायाधीशमध्ये ६ जनाले उनलाई हटाउने राय व्यक्त गरेका थिए।

फैसलासँगै यसअघि निलम्बित प्रधानमन्त्री सिनावात्रा पदबाट हट्नेछिन्। यो उनको पार्टी र सिनावात्रा वंशका लागि ठूलो धक्का हो।

फैसलाको सम्मान गर्ने उनले बताएकी छन्। अब चुनावसम्मका लागि उपप्रधानमन्त्रीले उनको कार्यभार सम्हाल्नेछन्। एजेन्सी